OQO-da «Men Qazaqpyn» jobasynyń úzdikteri anyqtaldy
ShYMKENT. QazAqparat - Ońtústikte «Men Qazaqpyn» mega-jobasynyń oblystyq irikteý kezeńi aıaqtaldy. Dúbirli dodada ár aýdannan úzdik shyqqan 73 ónerpaz qatysyp, terme, kúı, dástúrli án janry boıynsha ónerlerin ortaǵa saldy, dep habarlaıdy QazAqparat tilshisi.
17-29 mamyr kúnderi qala-aýdandarda ótken jobada qazylar alqasy ónerpazdardyń kásibıligine, biliktiligine, júris-turysy men kıim úlgisine mán berdi. Baıqaý qorytyndysy boıynsha ońtústikten úzdik dep úsh ónerpaz iriktelip, halyqaralyq mega-jobada óńirdiń namysyn qorǵaıtyn boldy. Olardyń qatarynda dástúrli án óneri boıynsha sozaqtyq Orazáli Jańabaev, terme janry boıynsha otyrarlyq Rýslan Aqymbekov, kúı janry boıynsha maqtaraldyq Shyńǵys Isaev ónersúıer qaýymnyń qoshemetine bólendi. Oblystan iriktelip shyqqan úsh ónerpaz aldaǵy ýaqytta «Qazaqstan» telearnasyndaǵy «Men Qazaqpyn» jobasyna qatysady dep kútilýde.
Respýblıkalyq aınalymda jeńiske jetken jeńimpazdar «Jyldyń eń úzdik dástúrli ánshisi», «Jyldyń eń úzdik termeshisi» jáne «Jyldyń eń úzdik kúıshisi» atalymdary boıynsha marapattalatyn bolady.
