OQO-da «Men Qazaqpyn» televızııalyq jobasyna irikteý bastalady
ShYMKENT. QazAqparat - Ońtústik Qazaqstan oblysynda «Men Qazaqpyn» televızııalyq jobasyna irikteý bastalady. Dástúrli án men kúı, terme syndy ónerimizdi ulyqtaıtyn «QAZAQSTAN» ulttyq telearnasynyń mega jobasy bıyl da jalǵasyn tabady. Bul týraly óńirlik kommýnıkatsııalar qyzmetinde ótken brıfıngte «Ontustik» telearnasynyń dırektory Baýyrjan Berdimuratov málim etti, dep habarlaıdy QazAqparat tilshisi.
Baýyrjan Berdimuratovtyń sózinshe, ońtústikten iriktelip shyqqan úsh ónerpaz respýblıkalyq deńgeıde óńir namysyn qorǵaıtyn bolady. Al, baıqaý qazaq xalqynyń tól óneri, sonyń ishinde jyr-termeler men kúılerdi búgingi zaman talabyna saı jańartyp, óskeleń urpaqqa jetkizý maqsatynda uıymdastyrylyp otyr. Oblystyq Mádenıet basqarmasynyń bólim basshysy Ǵalııa Alıkenqyzynyń aıtýynsha, arnaıy top oblystaǵy árbir aýdandy aralap, jobaǵa qatysýshylardy irikteıdi.
«Baıqaýǵa qatysýshylardyń jas ereksheligi - 18 ben 40 jas aralyǵy. Sondaı-aq, saxnaǵa shyǵatyn ónerpazdardyń kıimi qazaqy úlgide ári búgingi zaman talabyna saı bolýy tıis. Alǵashqy irikteý saıysy mamyr aıynyń 17-si kúni Sozaq pen Báıdibek aýdandarynda bastalady. 5 maýsym kúni oblystyq deńgeıde ótkizilip, aımaqtan án, kúı, terme janrlary boıynsha 3 jeńimpaz tamyz aıynda respýblıkalyq jarysqa attanady», - dedi Ǵalııa Alıkenqyzy.
«Men Qazaqpyn» jobasynyń respýblıkalyq aınalymynda jeńiske jetken jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúıshisi" atalymdary boıynsha marapattalady. Sondaı-aq, baspasóz máslıhatyna qatysqan jazýshy Marhabat Baıǵut atalǵan jobanyń mańyzdylyǵyna toqtaldy.
«Ulttyq kodymyz ben tamyrymyzdy tanytatyn «Men Qazaqpyn» syndy jobanyń jalǵasyn taýyp jatqandyǵyna qýanyshtymyn. Ultymyzdyń tarıhy men dúnıetanymynyń bir bólshegi osy ánimiz men kúıimizde, termede jatyr. Jas urpaqtyń osy ulttyq ónerge áýestigi rýhanı qundylyǵyn saqtaǵandyǵy. Bul turǵyda QR Aqparat jáne kommýnıkatsııalar mınıstri Dáýren Abaev pen "Qazaqstan" RTRK" AQ-nyń Basqarma tóraǵasy Erlan Qarın syndy azamattarǵa alǵys bildiremin», - dedi Marhabat Baıǵut.
