OQO-da Memlekettik-jekeshelik áriptestik jobalaryn júzege asyrý máseleleri talqylandy
ShYMKENT. QazAqparat - Búgin Ońtústik Qazaqstan oblysynda «Memlekettik-jekeshelik áriptestik jobalaryn júzege asyrý týraly» jıyn ótti.
Otyrysqa QR Ulttyq ekonomıka mınıstrligi bıýdjettik ınvestıtsııalar jáne memlekettik-jekeshelik áriptestikti damytý departamentiniń dırektory Nurym Aıazbaev, «Qazaqstandyq memlekettik jekeshelik áriptestik ortalyǵy» basqarma tóraǵasynyń orynbasary Ǵalymbek Mamraev, «Memlekettik-jekeshelik áriptestik» AQ-nyń vıtse-prezıdenti Aıdos Kóbetov jáne Jambyl, Qyzylorda men Ońtústik Qazaqstan oblysy ákimdikteriniń ókilderi qatysty, dep habarlaıdy QazAqparat HAA tilshisi.
Jıynǵa tóraǵalyq etken oblys ákiminiń birinshi orynbasary Darhan Satybaldy memlekettik-jekeshelik áriptestik tetiginiń tıimdi tustaryna toqtalyp ótti.
«Atalǵan mehanızm bıýdjet múmkinshiligin eskere otyryp, áleýmettik mańyzdy nysandardy salý nemese paıdalaný úshin qajetti qarjylyq bazany qamtamasyz etýdiń balamaly quraldarynyń biri bolyp tabylady. Memlekettik-jekeshelik áriptestik (MJÁ) mehanızmi memleket pen bıznestiń ózara paıdaly yntymaqtastyǵyn arttyryp, usynylatyn qyzmetter sapasyn jaqsartýǵa jáne qajetti ınfraqurylymdardy jańǵyrtýǵa múmkindik beredi», - dedi Darhan Amangeldiuly.
QR Ulttyq ekonomıka mınıstrligi men «Qazaqstandyq memlekettik jekeshelik áriptestik ortalyǵy» AQ-nyń uıytqy bolýymen ótken jıynda MJÁ negizindegi shaǵyn jobalar boıynsha baıqaý tártibi men qujattaryn yqshamdaý, jobaǵa qatysý kezindegi qarastyrý merzimin qysqartý máseleleri sóz boldy. Sondaı-aq, memlekettik-jekeshelik áriptestigi aıasynda jasalǵan kelisim- sharttardy úlgi retinde ala otyryp onyń iske asý barysynyń tájirıbesimen bólisý (dene shynyqtyrý-saýyqtyrý, dárigerlik ambýlatorııa, stýdenttik jataqhana, balabaqsha syndy nysandardyń qurylysy men iske qosylýy) talqylandy. Bastysy, ár oblysta saraptama qyzmetinsiz iske asyrýǵa bolatyn jobalar iriktelip alynyp, ony qalaı júzege asyratyny, baıqaý qujattary, joba kelisimderi túsindirildi. Bul tásil memlekettik-jekeshelik áriptestik jobasynyń iske asý merzimin eki esege qysqartyp, tıimdi nátıjege qol jetkizýge septigin tıgizbek.
«Memlekettik-jekeshelik áriptestik» AQ-nyń vıtse-prezıdenti A.Kóbetovtiń málimetinshe, osynaý joba aıasynda óńirlerde 350 jobany júzege asyrý josparlansa, búgingi kúnge deıin onyń 42-niń kelisim-sharty túzilip úlgergen. Al jalpy, MJÁ aıasynda elimizde jalpy quny 1 trıllıon teńgeden astam qarjy bolatyn jobalardy júzege asyrý kózdelip otyr.
Jalpy, Ońtústik Qazaqstanda 2017 jyly jergilikti deńgeıdegi 40 jobany júzege asyrý kózdelse, onyń 6-ýynyń búginde áleýetti jekeshelik áriptesi anyqtalǵan. Atalǵan jobalardyń deni balabaqsha, emhana, sport keshenderi syndy áleýmettik nysandar. Memlekettik-jekeshelik áriptestigi jobalaryn júzege asyrý boıynsha qazirgi kezde OQO respýblıkada alǵashqy jetilikke kirse, aldaǵy jyly alǵashqy bestikke enýdi kózdep otyr.
Aıta ketý kerek, mundaı tanymdyq semınarlar buǵan deıin respýblıkanyń Astana, Kókshetaý, Aqtóbe, Pavlodar, Taldyqorǵan qalalarynda uıymdastyryldy.
