OQO-da memlekettik baǵdarlama aıasynda 303 maman baspanamen qamtyldy

ShYMKENT. QazAqparat - Ońtústik Qazaqstan oblysynda «Dıplommen - aýylǵa» baǵdarlamasy aıasynda áleýmettik jáne agroónerkásip kesheni salasy mamandaryna turǵyn úı satyp alý nemese salý úshin jeńildetilgen bıýdjettik kredıt túrinde 954,447 mln. teńge baǵyttalyp, nátıjesinde 303 maman baspanaly boldy, - dep habarlaıdy  «QazAqparat» HAA tilshisi oblystyq ákimdikke  silteme jasap.  

Bıylǵy jyly da óńirde osy baǵdarlama aıasynda 1,1 mlrd. teńge bólinip,  nátıjesinde 300 jas maman turǵyn úıge qol jetkizbekshi. Al, jumyssyz júrgen mamandardy eldi mekenderge jumysqa tartyp, aýyldyń jaǵdaıyn kóterý jáne ondaǵy kadr tapshylyǵyn sheshý jumystary júıeli túrde júrgizilip keledi. Máselen,  «Dıplommen - aýylǵa» jobasy aıasynda ótken 2016 jyly 14 aýdan, qala boıynsha 773 mamanǵa 114,766 mln. teńge kóleminde birjolǵy kóterme járdemaqy usynyldy. Onyń ishinde 496 - bilim berý, 218 - densaýlyq saqtaý, 43 - agroónerkásiptik keshen, 9 - sport, 5 - mádenıet, 2 - áleýmettik qamsyzdandyrý salasynyń mamandary bolyp tabylady.

Sondaı-aq, «Jastar praktıkasy» baǵdarlamasy aıasynda 5 135 jas jumyspen qamtylsa, onyń 1 982-si aýyl jastary.  Al, osy baǵdarlamamen jumys istegen azamattardyń 3 890-y turaqty jumysqa ornalasqan.

Jalpy jastar arasyndaǵy jumyssyzdyq deńgeıi 2015 jylmen salystyrǵanda 2 paıyzǵa azaıyp otyr. Sonymen qosa, «Jasyl el» baǵdarlamasy boıynsha 2016 jylǵy jumys maýsymynda 1350 jas abattandyrý jáne kógalandyrý boıynsha jumystarmen qamtamasyz etilgen.

Al, stýdentterdiń jazǵy demalys ýaqytyn tıimdi paıdalaný maqsatynda «Stýdenttik qurylys jasaqtaryna» qurylys mamandyǵynda bilim alatyn 500 stýdent qamtylyp, 12 merdiger kompanııalarda jumystar atqardy.

Aıta keteıik, jalpy oblysta 762 124 jas bolsa, onyń ishinde 116 220-sy stýdent jastardy qurap otyr.

Aınur Aqbaeva