OQO-da mekteptiń burynǵy dırektory attestat satqan dep aıyptalýda
ShYMKENT. QazAqparat - Ońtústik Qazaqstan oblysynda mekteptiń burynǵy dırektorynyń ústinen qylmystyq is qozǵaldy. Maqtaaral aýdanyndaǵy Ferdoýsı mektebiniń burynǵy basshysy tájik azamattaryna attestat satqan dep aıyptalýda, dep habarlaıdy QazAqparat tilshisi.
Maqtaaral aýdandyq №2 sotynyń sýdıasy Abaı Nııazbekovtyń sózinshe, kúdikti Kobılhoja Basıev Qylmystyq kodekstiń eki babymen isti bolyp otyr.
«6 qańtar kúni seziktige eki aı merzimge qamaýǵa alý týraly sanktsııa berildi. Attestatty berýge negiz bolǵan oqýshylardyń Tájikstan Respýblıkasynan aýysyp kelgen degen qujattary, anyqtamalary jalǵan dep kúdiktelip otyr. Oǵan Qylmystyq kodekstiń 190 baby 2 bóliginiń 1-3 tarmaqtary (Alaıaqtyq) boıynsha qyzmet babyn paıdalanyp qylmys jasaǵan dep aıyptalýda. Sonymen qatar oǵan Qylmystyq kodekstiń 385 baby 1,3 bólikteri «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» boıynsha aıyp taǵyldy», - deıdi Abaı Nııazbekov.
Búginde burynǵy mektep dırektorynyń qorǵaýshylary qamaýda ustaýdy kepilge aýystyrý týraly oblystyq sotqa apellıatsııalyq shaǵym túsirdi. Oblystyq sottyń sýdıasy Tamara Smaılovanyń aıtýynsha shaǵym 12 qańtar kúni qanaǵattandyrylǵan.
