OQO-da mektepter 100 paıyz oqýlyqpen qamtyldy
ShYMKENT. QazAqparat - Ońtústik Qazaqstan oblysynda 2016-2017 oqý jylyna mektepter oqýlyqpen 100 paıyz qamtamasyz etilip otyr. Bul týraly oblystyq bilim basqarmasynyń mamandary málimdedi.
Mamandardyń aıtýynsha, memlekettik baǵdarlamaǵa sáıkes 2016 jyly jalpy oblys boıynsha qajetti oqýlyqtar men oqý-ádistemelik keshenderin satyp alýǵa jáne jetkizýge jergilikti bıýdjetten barlyǵy 2,7 mlrd. teńge bólingen. Bólingen qarjyǵa memlekettik satyp alý tártibimen bıylǵy jańa oqý jylynda 1 synyptardyń jańartylǵan bilim berý mazmunyndaǵy oqýlyqtary men oqý-ádistemelik keshenderi (birinshi synyptyń oqýlyǵy 10 dana), 4 synyptyń aǵylshyn tili oqýlyǵy, 8 synyptarǵa arnalǵan (8 synyptyń oqýlyǵy barlyǵy 18 dana) oqýlyqtar men oqý-ádistemelik keshenderi men 9 synyptyń dintaný oqýlyqtary alyndy.
Qazirgi tańda oqýlyqtar 100 paıyz tasymaldanyp, bilim berý mekemelerinde taratylý jumystary júrgizilýde. Sonymen qatar, 1 qyrkúıek kúni árbir birinshi synyp oqýshysyna Qazaqstan Respýblıkasynyń Prezıdenti N.Á.Nazarbaevtyń atynan «Meniń Otanym - Qazaqstan» kitaby saltanatty túrde syıǵa tapsyrylatyn bolady. Aıta keteıik, jańa oqý jylynda oblys boıynsha 73699 bala mektep tabaldyryǵyn alǵash attaıtyn bolady.
