OQO-da mektep oqýshylary ákimdik ǵımaratynda oqýǵa májbúr
ShYMKENT. QazAqparat - Ońtústik Qazaqstan oblysynda 262 oqýshy aýyl ákimdiginiń ǵımaratynda oqýǵa májbúr. Sebebi, ótken jyldyń tamyz aıynda bastalǵan jóndeý jumystary áli bitpegen, dep habarlaıdy QazAqparat HAA tilshisi.
Tóle bı aýdanyna qarasty Uzynaryq aýylynyń balalary bıylǵy oqý jylyn amaldap ótkizýde. Oqyp júr degen aty bolmasa, munda shákirtterge eshqandaı jaǵdaı jasalmaǵan. Bólmeleri tar, saldarynan aýa joq. Aýmaǵy nebári 10 sharshy metrdi quraıdy bólmelerde 16-18 baladan qysylyp-qymtyrylyp bilim alýda. Deneshynyqtyrý sabaqtary osynda bólmelerde ótedi. Sóıte tura, bul mektepke kórshi aýyldan taǵy birneshe bala tasymaldanady. Qazir, bilim uıasyndaǵy qolaısyzdyqtardyń bolyp jatqanyn ustazdar qaýymy da jasyrmaıdy.
«Ýaqytsha amaldap oqyp júrmiz endi. Bilim berý standartynan qalmaýymyz kerek qoı. Sol sebepten yńǵaılystyryp oqyp jatyrmyz», - deıdi mektep dırektory Rústem Amantaev.
Uzynaryq aýylyndaǵy mektepti kúrdeli jóndeýden ótkizý úshin jergilikti qazynadan 100 mıllıon teńge bólingen. Merdiger anyqtalyp, qurylysshylar iske ótken jyly tamyzda kirisipti. Alaıda aýyl turǵyndarynyń sózinshe jumysshylar mekteptiń shatyryn ashyp tastap, qabyrǵasyn sylaýdan bastasa kerek. Ábden, jumys aıaqtalǵan sátte jaýyn jaýǵan. Sóıtip, atqarylǵan jumystar bir sátte shaıylyp ketipti. Qazir, mekteptiń keıbir bólmelerinde qabyrǵalar kógerip tur eken. Bárinen de balalarǵa janymyz ashıdy, jóndeý jumystaryn nege balalar demalysqa shyqqanda istemeıdi,- deıdi aýyl aqsaqaldary.
«Jan ashyǵanda ne deısiz, endi ol balalardan obal. Ýaqytysynda jappady shatyrdy. Sodan jańbyr men qar aralasyp jaýyp, eki ortada qabyrǵalardyń bári ezilip ketti. Kirpishtiń bári sý boldy da, sol osyndaı jaǵdaıǵa tap boldyq», - deıdi Erkinbaı Aıtbaev. 
Al, aýdandyq bilim bóliminiń basshylyǵy bar kináni merdigerge artyp otyr. Eki jaqty kelisimshartqa sáıkes, olar qurylys jumystary naýryz aıynda aıaqtaýy tıis. Sol kezde qarajat tolyq tólenedi. Aýdannyń atqaminerleri merdigermen aldaǵy naýryz-sáýir aılarynda eseptesetinin aıtady. Sonyń saldarynan qurylysshy isti sońyna deıin jetkize almaýda eken.
«Merdiger kompanııa utyp alǵan kezde ózimniń qarjym bar, ózim aıaqtaımyn dep kepildikke otyrdy ǵoı. Sondyqtan biz onyń ne sebepti jumysty aıaqtaı almaı jatqanyn naqty bilmedik», - deıdi Tóle bı aýdandyq bilim bóliminiń bas mamany Nurlan Qarysbaev.
Qalaı bolǵanda da ýaqyt aqpan aıynyń bel ortasyna jetti. Merdigerler jumysty naýryz aıyna deıin aıaqtaı ala ma, joq pa ol jaǵy da belgisiz. Bastysy, bıylǵy oqý jylynda oqýshylar talapqa saı bilim ala aldy ma, ata-analardy osy suraq mazalaıdy. 
