OQO-da mektep bitirýshilerdiń «Týǵan jerge taǵzym!» sharasy ótti
ShYMKENT. QazAqparat - Ońtústik Qazaqstan oblysynda alǵash ret mektep bitirýshilerdiń «Týǵan jerge taǵzym!» saltanatty jıyny ótti. Atalǵan shara Ordabasyda túrki tildes úsh eldiń, ıaǵnı Qazaqstan, Ózbekstan jáne Qyrǵyz Respýblıkasynyń prezıdentteri basshylarynyń basqosýyna 25 jyl tolýyna oraı uıymdastyrylyp otyr, dep habarlaıdy QazAqparat tilshisi.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Ordabasy aýdanyndaǵy «Birlik» monýmenti «Ordabasy» ulttyq tarıhı-mádenı qoryǵynda ótken saltanatty sharaǵa oblys ákimi Janseıit Túımebaev pen oblystyq máslıhat hatshysy Qaırat Balabıev, «Nur Otan» OQOF birinshi orynbasary Nurmahan Joldasov jáne óńirdegi ardagerler qatysty. Sondaı-aq zııaly qaýym ókilderi men 12 joǵary oqý ornynyń basshylary, bilim salasynyń ardagerleri men ata-analar jáne mektep bitirýshi túlekter jalpy sany myńnan astam adam jınaldy.
Urpaqtar sabaqtastyǵyna jalǵaý bolý maqsatynda kıeli mekende ótkizilip otyrǵan jıynda sóz alǵan aımaq basshysy mektep bitirýshi túlekterge úlken ómir jolyna bastar qadamdarynyń sátti bolýyn tiledi.
«Búgingi saltanatty sharanyń Ordabasy taýynda ótkizilýi kezdeısoqtyq emes. Ordabasy taýy - qazaqtyń eldigin tanytar tusta orda bolǵan, Táýelsizdiktiń týyn jelbireter tusta kıeli tuǵyrǵa aınalǵan atameken! Ordabasy taýy - qazaq eliniń birligin nasıhattaıtyn, elimizdiń rýhyn kóteretin jáne 1726 jyly qazaq halqynyń jońǵarlar shapqynshylyǵy kezinde úsh júzdiń basyn qosyp, eldi qorǵaýǵa jumyldyrǵan tarıhı oryn. Elbasynyń «Ordabasyǵa oralý - qazaqstandyq patrıotızmniń jarqyn úlgisi» dep atap ketkenindeı, Sizderdi elimizdiń naǵyz patrıottary bolady degen senimmen, urpaqtar sabaqtastyǵyna jalǵaý bolsyn degen nıetpen osy kıeli mekenge shaqyrdyq», - dedi Janseıit Túımebaev.
Shara barysynda aımaq basshysy mektepti úzdik bitirgen jáne respýblıkalyq olımpıadalar men baıqaýlarda óńirimizdiń namysyn abyroımen qorǵaǵan úzdik 10 oqýshyny marapattap, baǵaly syılyqtar tartý etti. Budan bólek, 500 úzdik oqıtyn mektep bitirýshi túlekterge estelik syılyqtar úlestirilse, olar óz taraptarynan balabaqsha búldirshinderine «Bilim Álipbıin» tapsyrdy.
Jas urpaqtyń týǵan elge degen patrıottyq sezimin arttyryp, rýhanı sanany jańǵyrtýǵa baǵyttalǵan mektep bitirýshileriniń saltanatty sharasy kontserttik baǵdarlamamen jalǵasyn taýyp, ardagerlerdiń aq batasymen qorytyndylandy.
Aıta keteıik, «Birlik» monýmenti «Ordabasy» ulttyq tarıhı-mádenı qoryǵy 1993 jyldyń 26 mamyrynda arnaıy Elbasy Nursultan Ábishuly Nazarbaevtyń qaýlysymen ashylǵan. Bıyl atalǵan qoryqtyń qurylǵanyna 25 jyl tolyp otyr.
