OQO-da mektep bitirýshilerdiń 71 paıyzy UBT tapsyrady
ShYMKENT. QazAqparat - Ońtústik Qazaqstan oblysynda bıyl 23 760 oqýshy Ulttyq biryńǵaı test tapsyrady. Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq bilim basqarmasy basshysynyń mindetin atqarýshy Raýshan Erǵashova málim etti, dep habarlaıdy QazAqparat HAA tilshisi.
Erǵashovanyń aıtýynsha, UBT oblysta 16 jerde ótkiziledi,
UBT tapsyratyn oryndardyń tórteýi joǵary oqý oryndarynyń bazasynda, úsheýi aýdan ortalyqtaryndaǵy kolledjderde bolmaq. Al, toǵyzy jalpy orta mektepterdiń bazasynda ornalasqan. Árbir UBT ótkizý pýnktterinde 11-den 14-ke deıin aýdıtorııalar daıarlanyp, olar uıaly telefon sıgnaldaryn tunshyqtyrǵysh 237 qurylǵymen jabdyqtalyp otyr.
«Bıylǵy jyly mınıstrliktiń tapsyrmasyna sáıkes 91 jańa úlgidegi 4G jıiliktegi tunshyqtyrǵyshtardy alýǵa jergilikti bıýdjetten qarjy qaralyp, satyp alý jumystary júrgizilýde. Sonymen qatar testileý pýnkterinde 26 ramaly metall izdegishter, 226 salqyndatqysh, testileý kezinde beınejazba júrgizý maqsatynda 42 beıne tirkegish ornalastyryldy», - dedi spıker.
Qazirgi tańda óńirde 33 112 mektep bitirýshiniń 71,8 paıyzy UBT tapsyrady dep kútilýde. Oǵan ótinish qabyldaý 10-naýryzdan 10-mamyrǵa deıin júrgiziledi.
UBT tapsyrýǵa nıet bildirgen mektep bitirýshileri onyń jańa formatyna daıyndalý maqsatynda aldyn-ala baıqaý testerine qatystyrylýda. Naýryz aıynda alynǵan baıqaý testeri boıynsha ortasha bal - 75,2-ni qurap otyr.
Sondaı-aq basqarma basshysynyń mindetin atqarýshy UBT tapsyratyn 23760 bitirýshiniń 13585-i tasymaldaýdy, 12443-i tamaqtanýdy, 1825 oqýshy jatyn oryndy qajet etetinine toqtaldy. Búgingi tańda jergilikti bıýdjetten mektep bitirýshi túrekterdi testileý úshin qajetti qarajat bólinip, uıymdastyrý jumystary júrgizilýde eken.
Aıta keteıik, bıylǵy jyly oblysta 1429 túlek «Altyn belgi» belgisine, 852 bitirýshi úzdik attestatqa, 9-synypty bitirýshilerdiń 3568-i úzdik kýálikten úmitti.
Budan bólek, aǵymdaǵy jyly «Altyn belgi» ıegerleri mektepterdegi memlekettik bitirý emtıhandarynyń qorytyndysymen mektep dırektorynyń buıryǵymen bekitiletin bolady.
