OQO-da medıtsınalyq tekserýdiń úshinshi kezeńi bastaldy
ShYMKENT. QazAqparat - Ońtústik Qazaqstan oblysynda medıtsınalyq tekserýdiń úshinshi kezeńi bastaldy. Osy shara aıasynda búginnen bastap joǵary oqý oryndarynyń stýdentteri flıýrografııalyq tekserýden ótip jatyr.
Óńirdiń Densaýlyq saqtaý basqarmasynyń uıymdastyrýmen ótkizilgen shara jaman aýrýlardyń aldyn alý maqsatynda qolǵa alynyp otyr, dep habarlaıdy QazAqparat HAA tilshisi.
Medıtsınalyq tekserý aıasynda búgin Ońtústik Qazaqstan memlekettik pedagogıkalyq ınstıtýty men Ońtústik Qazaqstan memlekettik farmatsevtıkalyq akademııasynyń aýlalaryna jyljymaly flıýrografııalyq apparattar qoıyldy. Sondaı-aq óńirde Jumyspen qamtýdy úılestirý jáne áleýemettik baǵdarlamalar basqarmasyna qarasty jabyq mekemelerdegi adamdar flıýrografııalyq tekserýden ótkizildi.
«Ekinshi kezeńde Bilim basqarmasyna qarasty 14 jabyq mekemede medıtsnalyq tekserýler júrgizildi. Endi úshinshi kezeńde joǵary jáne orta oqý oryndaryndaǵy 75 myńnan astam stýdentti qazan aıyna deıin túgel tekserýden ótkizýdi qolǵa alyp otyrmyz. Kelesi aptada M.Áýezov atyndaǵy Ońtústik Qazaqstan memlekettik ýnıversıtetine de osyndaı jyljymaly flıýrografııalyq apparat qoıamyz», - dedi Oblystyq densaýlyq saqtaý basqarmasynyń basshysy Muqan Egizbaev.
Aıta keteıik, halyqty jappaı jylyna bir ret flıýrografııalyq tekserýden ótkizip turý josparly túrde júrgiziledi. Jyl saıyn oblys boıynsha 1 mln. 198 myń 681 turǵyndy tekserý josparlansa, onyń 75572-in stýdentter quraıdy. 2017 jyldyń 3 aıynda jalpy jyldyq josparǵa sáıkes halyqtyń 23,2%-y tekserýden ótti.
