OQO-da medıtsınalyq buıymdar shyǵaratyn zaýyt iske qosyldy
ASTANA. QazAqparat - Shymkenttegi «Tassaı» ındýstrııaldy aımaǵynda medıtsınalyq jabdyqtardyń 17 túrin shyǵaratyn zaýyt iske qosyldy. «Marai E7 Group» jobasynyń ashylý saltanatyna Ońtústik Qazaqstan oblysynyń ákimi Janseıit Túımebaev qatysyp, zaýyttyń jumys barysymen tanysty, dep habarlaıdy oblystyq ákimdiktiń baspasóz qyzmeti.
Óńir basshysy oblys ekonomıkasyn ártaraptandyrý jáne óńirdegi kásipkerlikti damytýda ındýstrııalyq aımaqtardyń mańyzdy ról atqaryp otyrǵanyna toqtaldy.
«Atalǵan aımaqtardyń biri - Tassaı ındýstrıaldy aımaǵy. Jalpy aýmaǵy 89 ga quraıtyn aımaqta búginde 24 ınvestıtsııalyq joba iske asyrylýda. Osy jobalardyń biri «Marai E7 Group» JShS-nyń medıtsınalyq maqsattaǵy ortopedııalyq buıymdar shyǵaratyn zaýyty. Joba aıasynda oblysqa 393 mln. teńge ınvestıtsııa tartylyp, 50 adam jumyspen qamtylatyn bolady»-dedi Janseıit Qanseıituly.
Ońtústik koreıalyq tehnologııamen jabdyqtalǵan kásiporynda jylyna 500 myń bınt pen 274 myń ortopedııalyq buıym ázirlenetin bolady. Zaýyt ónimi túrli synyq-jaraqatta qoldanylyp, salmaǵynyń jeńildiligi, elastıkalyq ıilgishtigi, rentgen ótkizgishtigimen jáne jyldam qataıýymen erekshelenedi. TMD elderi boıynsha analogy joq kásiporyn Qazaqstan naryǵyn tolyq qamtamasyz etýge qaýqarly.
Aıta keteıik, «Marai E7 Group» zaýytynyń daıyn ónimine suranys óte joǵary. Qazirgi tańda óndiris orny Túrkııa, Ózbekstan jáne Qyzǵyzstan elderine ónimderin eksporttaý maqsatynda jumys jasap jatyr.
Atalǵan kásiporyn «SQ-Farmatsııa» JShS-men 10 jylǵa uzaq merzimdi kelisimge qol qoıyp, birlese jumys isteýge ýaǵdalasyp otyr.
