OQO-da medıtsınalyq aqparattandyrý júıesi 100 paıyz qamtylady
ASTANA. QazAqparat - Jyl sońyna deıin oblysymyzdaǵy barlyq densaýlyq saqtaý uıymdarynda medıtsınalyq aqparattandyrý júıesi 100 paıyz ornatylatyn bolady, dep habarlaıdy OQO ákiminiń baspsóz qyzmeti.
Atalǵan júıe densaýlyq saqtaý uıymdarynyń jumystaryn avtomattandyrýdy, qajetti emhanalyq jáne ákimshilik aqparat qurýdy jáne qaǵazsyz tehnologııalarǵa kezeń-kezeńmen kóshýdi qamtamasyz etedi. Búgin bul týraly Shymkent qalalyq №6 emhana jumysymen tanysqan Ońtústik Qazaqstan oblysynyń ákimi Janseıit Túımebaev málim etti.
Aıta keteıik, keshendi medıtsınalyq aqparattyq júıesi oblysymyzda 2017 jyldyń 1 aqpanynan bastap jumys istep keledi. Qazirgi tańda atalǵan jańa júıe oblystyń ambýlatorlyq-emhanalyq jáne 38 medıtsınalyq uıymdary men bólimshelerinde ornatylǵan. Atalǵan pılottyq júıege statsıonarlyq qyzmet kórsetetin uıymdar da qosylyp, júıeni tırajdaý máselesin jyl sońyna deıin aıaqtaý josparlanyp otyr.
«Oblysymyzdyń densaýlyq saqtaý salasy kúnnen-kúnge erekshe qarqynmen damyp keledi. Qazirgi tańda medıtsınalyq kómekti jaqsartý maqsatynda oblysmyzdaǵy barlyq densaýlyq saqtaý uıymdaryna medıtsınalyq aqparattandyrý júıesin ornatý ústindemiz. Sonymen qatar, osy baǵytta medıtsınalyq uıymdardy 2017 jyly tolyq kompıýtermen jabdyqtaý josparlanyp otyr. Bul júıeniń tıimdiligi mol. Sondyqtan jańashyldyqqa umtylýdan qoryqpaı, halyqtyń densaýlyǵyn jaqsartýda árqaısymyz aıanbaı eńbek etýimiz kerek», - dedi Janseıit Qanseıituly.
«Damý» aqparattyq tehnologııalyq ortalyǵy ázirlegen joba - «DamuMed» keshendi medıtsınalyq aqparattyq júıesi dep atalady. Atalǵan óńirlik júıe medıtsınalyq uıymdarda ishki protsessti avtomattandyryp qana qoımaı, medıtsınalyq kómek kórsetý deńgeıleriniń bir-birimen ıntegratsııasyn, onkologııa, týberkýlez, kardıologııalyq arnaıy qyzmetterdiń shuǵyl sabaqtastyǵyn qamtamasyz ete alady. 
