OQO-da mas kúıinde rýlge otyrǵan prokýror jumystan ketti

Bul týraly búgin oblystyq prokýratýranyń baspasóz qyzmeti málimdedi, dep habarlaıdy QazAqparat HAA tilshisi.  

Oblystyq prokýratýranyń tártiptik komıssııasy búgin osyndaı sheshim qabyldaǵan. Komıssııa bergen málimetke sáıkes, Nurjan Polatov quqyq qorǵaý organdary qyzmetkerlerine jat qylyq jasap, tıisti erejedegi tártipti buzǵan. Sondyqtan qadaǵalaýshy organda qyzmet atqarýǵa laıyq emes dep tanyldy. Mundaı sheshimdi komıssııa Shymkent qalalyq mamandandyrylǵan ákimshilik sotynyń sheshimi ózgerissiz qalǵan soń qabyldap otyr. Búgin oblys prokýrory Ibrahım Imanovtyń buıryǵymen Polatov qyzmetinen ketti.

Atalǵan sot buǵan deıin Nurjan Polatov Ákimshilik quqyqbuzýshylyq kodeksiniń 608 baby, 1-shi bóligi (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý) boıynsha kináli dep tanylyp, 3 jylǵa kólik júrgizý quqynan aıyrylǵan bolatyn. Kúni keshe appelıatsııalyq sot bul sheshimdi ózgerissiz qaldyrǵan edi.

Eske salaıyq, 6 mamyr kúni Shymkenttiń jergilikti polıtsııa qyzmetkerleri oblystyq prokýratýra qyzmetkerin iship alyp, kólik júrgizdi dep aıyptaǵan bolatyn. Tipti onyń rýlde bolǵanyn dáleldeıtin beınejazbany jarııa etken. Alaıda qadaǵalaý organynyń ókili polıtseılerdiń oǵan qatysty ákimshilik hattama toltyrýyn zańsyz dep, sotqa keri shaǵym túsirdi. 19 maýsym kúni bul is Shymkent qalalyq ákimshilik sotynda qaralyp, sýdıa Nurlan Álıev prokýrordy kinásiz dep tapqan. Ári onyń shaǵymyn qanaǵattandyryp, polıtsııa qyzmetkerleri toltyrǵan hattamanyń kúshin joıdy. Alaıda mundaı sheshimmen kelispegen qalalyq Jergilikti polıtsııa bastyǵy Danııar Meıirhan oblystyq sotqa shaǵymdandy. Osydan keıin ǵana oblystyq  sot polıtseılerdiń áreketin durys dep taýyp, zańdy sheshim qabyldady.