OQO-da mas kúıinde kólik júrgizgen sheneýnik qyzmetinen ketti
ShYMKENT. QazAqparat - Ońtústik Qazaqstan oblysynda laýazymdy tulǵa kólikti mas kúıde júrgizgeni úshin qyzmetinen ketti, dep habarlaıdy QazAqparat tilshisi.
Mundaı sheshimdi Ońtústikt Qazaqstan oblysynyń Ádep jónindegi keńes músheleri qabyldaǵan. Keńeste Otyrar aýdandyq Ádilet basqarmasynyń basshysy M.Qasymbaevtyń isin qaraý barysynda, polıtsııa qyzmetkerleri onyń ústinen ákimshilik quqyqbuzýshylyq týraly hattama toltyrǵany anyqtaldy.
Keıinnen sottyń qaýlysymen sheneýnik 3 jyl merzimge kólik quralyn basqarý quqyǵynan aıyrylǵan M.Qasymbaev ákimshilik quqyqbuzýshylyq týraly hattamamen kelispeı, kúshin joıýdy surap sotqa shaǵym keltirgen. Alaıda sot sheshiminiń kúshin joıýǵa negiz bolatyn mán-jaılardy kórsete almaǵandyqtan, shaǵymdy qanaǵattandyrýdan bas tartylǵan. Barlyq materıaldardy zerdeleı otyryp, Ádep jónindegi keńes músheleri Murat Qasymbaevqa qatysty «atqaratyn memlekettik laýazymynan bosatý» túrindegi tártiptik jaza qoldaný týraly usynysty oblystyq Ádilet departamenti basshysyna joldady.
Aıta keteıik, atalǵan keńestiń kezekti otyrysynda taǵy 7 memlekettik qyzmetshiniń jaýapkershiligi qaraldy. Al, buǵan deıingi usynystaryna sáıkes Kentaý qalalyq kásipkerlik jáne týrızm bóliminiń basshysy E.Ashırov, sondaı-aq, Ordabasy aýdany Bórjar aýylynyń ákimi B.Dúısenbaev jumystan bosatylǵan bolatyn.
