OQO-da mal urlyǵy qylmystary óz deńgeıinde ashylmaı otyr
ShYMKENT. QazAqparat - Ońtústik Qazaqstan oblysynda mal urlyǵy qylmystary óz deńgeıinde ashylmaı otyr. Bul týraly oblys prokýrorynyń orynbasary Ábil Qojahmetov málimdedi. Qadaǵalaý organy ókiliniń sózinshe, ótken jyly jekelegen aýdandarda mal urlyǵy 20-dan 53 protsentke deıin ósken bolsa, sonyń tek 22% ǵana ashylǵan, dep habarlaıdy QazAqparat HAA tilshisi.
Bir ǵana Maqtaaral aýdanynda oryn alǵan 172 mal urlyǵynyń tek 23-i ǵana áshkere bolypty. Myrzakent kentinde 64 mal urlyǵynyń 3-ýi ǵana ashylsa, bıylǵy 9 mal urlyǵynyń birde-bireýi boıynsha kináliler ustalmapty. Mundaı jaǵdaı barlyq aýdandarda oryn alyp otyr deıdi prokýrorlar. Esesine urylardan tynym bolmaı tur eken.
«Byltyrǵy jyly, 176 ýchaskelik polıtsııa ınspektorynyń bekitilgen ákimshilik aımaqta turmaıtyny, aýdan ortalyǵy nemese basqa eldi-mekenderden qatynap jumys isteıtini anyqtaldy. Máselen, Saryaǵash aýdanynyń turǵyny O. urlanǵan 21 bas jylqysynyń beseýin ózi izdep júrip, Saıram aýdanynan tapqan. Al, aýdandyq ishki ister basqarmasy isti sozbalańǵa salyp, tıisti tulǵalardan jaýap almaǵan. Túrkistan qalasy prokýrorymen iri kólemde mal urlyǵy jıi oryn alatyn Orańǵaı, Babaıqorǵan aýyldyq okrýgterinde, urlyq bolǵan jerdi kvadrokopter arqyly beınetúsirý júrgizýmen qaraý barysynda, 7-10 shaqyrym aınalasynda urlanǵan maldy avtokólikke artýǵa beıimdep, arnaıy qazylǵan oryndar anyqtalǵan»,-deıdi Qojahmetov.
Prokýrordyń aıtýynsha, urylar jylqyny úıirimen, usaq maldy tabynymen aıdap ketýden qaımyqpaıdy. Óıtkeni, satamyn dese de, soıamyn dese de daıyn turǵan deldal da bar, soıyp-satatyn oryn da jetkilikti. ıAǵnı, eshkim ol maldyń ıesin de, qujatyn da surap jatqan joq. Al, uryny ustaýǵa, joǵalǵandy tabýǵa polıtsııanyń qaýqary jetkiliksiz.
«Sondyqtan, oblystyq Іshki ister departamentine mal urlyǵy qylmysy boıynsha arnaıy jedel-tergeý tobyn qurýdy, urlyq jaıylymdyq jerde bolǵan jaǵdaıda oqıǵa orynyn kvadrokopter qurylǵysyn paıdalanyp qarap beınetúsirilimdi is qujattaryna tirkeýdi, ár aýyldyq okrýgter ýchaskelik ınspektorlaryna ózine bekitilgen aımaqtaǵy mal sany, jaıylym jerler, aýyldan shyǵatyn-kiretin joldardyń syzbasyn, urlyq oryn alatyn jerlerde únemi reıd júrgizý usynyldy»,- deıdi oblys prokýrorynyń orynbasary.
Aıta keteıik, jyldar boıy qordalanyp qalǵan bul keseldiń etek alyp bara jatqanyn eskere otyryp, prokýrorlar Jergilikti polıtsııa qyzmeti, ishki ister jáne basqa da quzyrly organdarmen birlesip, «Mal urlyǵyna nátıjeli tosqaýyl» jobasyn júzege asyryp jatyr.
