OQO-da Lıtva Respýblıkasynyń qurmetti konsýldyǵy ashyldy
Lıtva Respýblıkasynyń Shymkenttegi qurmetti konsýly bolyp Mamadııar Qadyrbekov taǵaıyndaldy. Dıplomatııalyq ókildiktiń ashylý maqsaty - eki jaqty iskerlik baılanysty jaqsartý men ekonomıkalyq jáne mádenı yntymaqtastyqty damytý bolyp tabylady.
Ońtústik Qazaqstan oblysynyń ákimi Janseıit Túımebaev konsýldyqtyń ashylý rásimi aldynda Qazaqstandaǵy Lıtvanyń Tótenshe jáne Ókiletti Elshisi Vıtaýtas Naýdýjaspen kezdesti.
Basqosýda qos tarap ekonomıkalyq baılanystardy odan ári nyǵaıtý men týrızm salasynda áriptestik qarym-qatynasty ornatý máselelerin talqylady.
Oblys ákimi mártebeli qonaqtarǵa óńirdiń ekonomıkalyq jáne ınvestıtsııalyq múmkindikteri men tranzıttik áleýeti jaıyn málimdep, Qazaqstan men Lıtva Respýblıkasy arasynda ózara tıimdi seriktestik ornatylǵanyn jetkizdi.
«Ońtústik Qazaqstan oblysy ónerkásiptik-agrarlyq aımaq bolyp tabylady. Bizdiń óńirde qolaıly ınvestıtsııalyq klımat qurylǵan, sondaı-aq bıznesti yntalandyrý jáne damytýdyń tıisti tetikteri qarastyrylǵan. Óńirimizde 11 ındýstrıaldy aımaq pen 1 ekonomıkalyq aımaq jumys isteıdi. Onda sheteldik ınvestorlarǵa túrli jeńildikter qarastyrylǵan. Bul eki el arasyndaǵy taýar aınalymyn keńeıtip, ınvest jobalardyń kóbeıýine sebep bolary sózsiz», - dedi ákim.
Dıplomatııalyq ókildik qos el arasyndaǵy ózara yntymaqtastyqty ornatý men damytýdy josparlap otyrǵanyn aıtqan Vıtaýtas Naýdýjas lıtvalyq kásipkerler Ońtústik Qazaqstan oblysynyń mamandarymen áriptestik baılanys ornatýǵa nıetti ekenin jetkizdi. Olardy óńirdegi agrarlyq sektordyń damýy, atap aıtqanda et óńdeý jumystary qyzyqtyr otyr.
Eki kúndik jumys saparymen Baltyq jaǵalaýy elinen kelgen delegattar óńirdegi ındýstrıaldy aımaqtyń jumysymen tanysyp, Túrkistan qalasyndaǵy «Áziret Sultan» memlekettik tarıhı-mádenı qoryq-mýzeıin tamashalamaq.
