OQO-da Qyzyl kitapqa engen qustardy qamaýda ustaǵan adam sottaldy
ShYMKENT. QazAqparat - Saryaǵash qalasyndaǵy dámhananyń ıesi sırek kezdesetinin bile tura Qyzyl kitapqa engen qustardy torda ustap kelgen, dep habarlaıdy QazAqparat tilshisi.
Saryaǵash aýdandyq prokýratýrasynyń málimetinshe, dala qyrany men aq quıryqty qyrandy dámhana ıesi arnaıy tor jasatyp, kópshilik keletin jerge ilip qoıypty. Sóıtip jurtqa keremet qustardy kórsetip, maqtanyp kelgen. Alaıda onyń zańsyz áreketi quzyrly organ ókilderimen áshkere boldy. Tipti Qyzyl kitapqa engen qustardy erkindikten aıyrǵany úshin dámhana qojaıynynyń ústinen qylmystyq is qozǵalyp, tergeý amaldary júrgizildi.
Tártip saqshylaryna jaýap berý barysynda saryaǵashtyq qustardy jaraqattanǵan kúıde taýyp alǵanyn, olardy emdetip qaraǵanyn aıtypty. Keıin qaıta jibergisi kelgende qustar ózderi ushpaı qoıdy dep túsindirgen. Alaıda óńirdiń tabıǵat qorǵaý basqarmasynyń arnaıy mamany bul ýájderdi joqqa shyǵardy. Maman sotta «bul qustardyń meken etý ortasyna Saryaǵash aýdanynyń aýmaǵy kirmeıtinin jáne osy aýdanǵa qustar tek zańsyz jolmen jetkizilgen» degen qorytyndy bergen.
Osy qorytyndyny negizge ala otyryp Saryaǵash aýdandyq soty dámhana ıesin Qyzyl kitapqa engen qustardy zańsyz ustaǵany úshin kináli dep taýyp, ony bir jylǵa bas bostandyǵyn shektedi. Sondaı-aq aıyptalýshyǵa 450 aılyq eseptik kórsetkish kóleminde aıyppul saldy. Al urlanǵan qustar Shymkent zoobaǵyna berildi.
