OQO-da qyzmettik ıtterdiń kómegimen 800-den astam qylmys ashylǵan
ShYMKENT. QazAqparat - Ońtústik Qazaqstan oblysynda qyzmettik ıtterdiń kómegimen 800-den astam qylmys ashylǵan. 120-dan astam esirtkimen baılanysty qylmystar anyqtalyp, zańsyz aınalymnan 30 keliden astam esirtki tárkilengen, dep habarlaıdy QazAqparat tilshisi.
OQO Іshki ister departamenti baspasóz qyzmetiniń málimetinshe, Kınologııa qyzmet ortalyǵy qylmystardyń aldyn alý men ashýda, esirtki qylmystaryn anyqtaý men qylmyskerlerdi ustaýǵa arnaıy daıyndyqtan ótken ıtterdi paıdalanatyn qurylym bolyp tabylady. Munda ártúrli qyzmetke daıyndalǵan 40-qa jýyq ıt jarylǵysh zattardy anyqtaý, esirtki zattaryn tabý, odorologııalyq eksperımentte keńinen qoldanylyp keledi. Máselen, jýyrda ǵana ortalyqtaǵy spanıel tuqymdy «Emıd» esimdi ıt «Shymkent-Tashkent» tasjolynda avtokólikti tintý barysynda artqy oryndyqtan 7,5 kg. geroın taýyp, tárkileýge septigin tıgizgen.
«Kınolog bolý úshin janýarǵa bar mahabbatyńdy berý jetkiliksiz. Olardy kúshik kezinen bastap úıretesiń, ósiresiń, daıyndaısyń. Bul jumys úlken jaýapkershilikti, tııanaqtylyqty, eńbekqorlyqty talap etedi. Bastysy shydamdylyq kerek. Taǵy bir aıtar mańyzdy nárse, qyzmette ıtterdi durys qoldana alý kınologqa 70 paıyz, ıtke 30 paıyzy ǵana qatysty. Sondyqtan, kásibı maman bolý ýaqytpen, udaıy tájirıbemen keledi», - deıdi Kınologııa qyzmetiniń bastyǵy, polıtsııa podpolkovnıgi Dáýren Ahmetov.
