OQO-da «Qyz Jibek» etno-folklorlyq mıýzıkli qoıylmaq
Bul týraly óńirlik kommýnıkatsııalar qyzmetinde ótken brıfıngte "Astana Musical" teatrynyń ártisi Saılaý Qamıev málim etti, dep habarlaıdy QazAqparat tilshisi.
Saılaý Qamıevtiń aıtýynsha, óner ujymynyń ońtústiktegi saparynyń maqsaty - elimizdiń óner salasyndaǵy úzdik jetistikterin kórsetý bolyp tabylady. Óıtkeni , «Astana Musical» - elimizdegi jáne Ortalyq Azııadaǵy tuńǵysh mamandandyrylǵan mıýzıkl teatry sanalady. Elordalyq óner ujymy zamanaýı jańalyqtardy negizge ala otyryp, otandyq jáne álemdik mıýzıklderdiń biregeı repertýarynyń ortalyǵyna aınalyp keledi. Al, «Qyz Jibek» etno-folklorlyq qoıylymynyń qoıýshy-rejısseri Ashat Maemırov, rejısseri E.Nursultan, baletmeısteri A.Sadykova jáne Jibek pen Tólegenniń rólin teatr ártisteri I.Rızabekova men O.Igilik somdaıtyn bolady.
«Teatr ártisteri elimizdiń rýhanı qundylyqtaryna aınalǵan halyq ánderi men kompozıtorlarynyń shyǵarmalary jáne ulttyq operamyz ben klassıkalyq mýzykamyzdyń injý-marjandaryn qamtıtyn «Qyz Jibek» qoıylymyn sahnalaıdy. Dala teatrynyń negizindegi týyndy kórermenge qazaq halqynyń ulttyq bolmysy men tynys-tirshiligin aıqyn kórsetedi. Sondaı-aq, ónersúıer qaýym spektaklde qos aqynnyń sóz tartysy, oı qaqtyǵysymen qatar halqymyzdyń sýyrypsalmalyq ónerin dáripteıtin aıtysty tamashalaıtyn bolady», - dedi brıfıngte Saılaý Ǵalymjanuly.
Baspasóz málıshatyna qatysqan Qazaqstannyń eńbek sińirgen qaıratkeri Aınur Bermuxambetova bolsa, atalǵan mıýzıkl «Jahandaǵy zamanaýı qazaqstandyq mádenıet» jobasy aıasynda 2017 jyldyń jeltoqsan aıynda Frantsııa, Belgııa, Avstrııa, Reseı memleketterinde sahnalanyp, sheteldik talǵampaz kórermenniń qoshemetine bólengendigin jetkizip, teatr tarıhyna toqtaldy.
Aıta keteıik, «Qazaqkontsert» Memlekettik kontserttik uıymynyń «Astana Musical» teatry QR Mádenıet jáne sport mınıstrliginiń qoldaýymen 2016 jyldyń maýsym aıynda qurylǵan. Óner ordasy óz shymyldyǵyn Baqyt Qaıyrbekov pen Ánnás Baǵdattyń «Dostar serti» mıýzıklimen ashqan bolatyn. Búginde teatr repertýarynda kópshiliktiń qoshemetine ıe bolǵan 5 qoıylym bar», - dedi Aınur Bermuxambetova. 
