OQO-da qytaılyq kásipkerlerdiń bastamasymen eki zaýyt salynady
ShYMKENT. QazAqparat - Qytaılyq kásipkerler Ońtústik Qazaqstan oblysynda bıoetanol óndirý zaýyty men fosfor óndirisiniń qaldyqtaryn qaıta óńdeýden ótkizetin óndiris oshaǵyn iske qospaqshy.
Kórshi eldiń ınvestorlary bıoetanol óndirisine Otyrar aýdanyn, al fosfor qaldyqtaryn óńdeýde Sozaq óńirin qolaıly kórip otyr. Búgin bul týraly Ońtústik Qazaqstan oblysynyń ákimi men Qytaı ftorselıkondyq óndirisi qaýymdastyǵynyń dırektory Sıanjýn Tsao bastaǵan delegatsııanyń kezdesýinde málim boldy, dep habarlaıdy «QazAqparat HAA tilshisi.
Kezdesýde qytaılyq delegatsııany bastap kelgen Sıanjýn Tsao negizgi eki baǵytta zaýyt qurylysyn bastaýǵa múddeli ekendikterin jetkizdi.
«Biz Ońtústik Qazaqstan oblysynda negizgi eki baǵytty damytýdy josparlap otyrmyz. Onyń biri - bıoetanol óndirý isi, al ekinshisi fosfor qaldyqtaryn qaıta óńdeýden ótkizý. Eger ekijaqty kelisimder oryndalyp jatsa, eki zaýyttyń qurylysyn tez arada bastaýdy jón kórip otyrmyz», - dedi ol.
Óz kezeginde óńir basshysy Janseıit Túımebaev sheteldik ınvestorlarǵa oblystyń ınvestıtsııalyq tartymdylyǵy men ındýstrıaldy-ınnovatsııalyq jobalardy iske asyratyn aımaqtardyń áleýetin baıandady. Oblys ekonomıkasyn órge súırep kele jatqan salalarǵa toqtalǵan ákim ınvestıtsııa tartý boıynsha jergilikti bılik tarapynan kórsetiletin jeńildikter men múmkindikterge keńinen toqtaldy.
«Elge ınvestıtsııa tartý - ekonomıkanyń eń negizgi tetigi. Osyny eskere otyryp biz kásipkerlerge barynsha qoldaý bildirip otyrmyz. Óńirimizde 11 ındýstrııalyq 1 arnaıy ekonomıkalyq aımaǵymyz jumys isteıdi. Sheteldik ınvestorlar kedendik, múliktik salyqtardan bosatylady. Sondaı-aq jer telimi, ınfraqurylymdyq qajettilikterdiń bárimen tolyq qamtamasyz etetin bolamyz», - dedi Janseıit Qanseıituly.
Sheteldik ınvestorlardyń eki jobasyna da qoldaý bildirgen oblys ákimi tıisti basqarma basshylaryna naqty tapsyrmalar júktedi. Tıisti qujattardy tezdetip ázirlep, qajetti jer telimderin bólýdi jáne de eki zaýyttyń da irgetasyn bıyl qalaýdy tapsyrdy.
Aıta keteıik, búgingi tańda álemde bıoetanol óndirisiniń órisi keńip, paıdalanýshylar qatary artyp keledi. Ǵylym tilimen aıtsaq, bıoetanol degenimiz tehnıkalyq absolıýttendirilgen spırt quramy 99,9 gradýsty quraıdy. Atalmysh jańa otyn túri janar-jaǵar maıǵa qaraǵanda, aýany lastamaıdy jáne parnıktik gazdardy da bólmeıdi. Bir sózben aıtqanda adamzat balasyna da, qorshaǵan ortaǵa da zııansyz otyn. Qytaılyq ınvestorlar bıoetanol óndirý isinde ońtústikqazaqstandyq júgeri men bıdaı, arpa qaldyqtaryn paıdalanbaq. Bul óz kezeginde Ońtústik Qazaqstan oblysynyń aýyl sharýashylyq salasyn damytýdyń erekshe joly bolǵaly otyr.
