OQO-da «Qys - 2017» komandalyq oqý-jattyǵý ótti
ShYMKENT. QazAqparat - Búgin Ońtústik Qazaqstan oblysynda «Qys-2017» respýblıkalyq komandalyq-shtabtyq oqý-jattyǵýy ótti, dep habarlaıdy QazAqparat tilshisi.
Sharaǵa oblystyq ishki ister jáne tótenshe jaǵdaılar departamentteri, oblystyń, qalalar men aýdandardyń azamattyq qorǵaý qyzmetteri, tótenshe jaǵdaı komıssııasy, óńirdegi dıslokatsııalanǵan Qorǵanys mınıstrliginiń bólimderi qatysty,
Oblys ákimdigi aldyndaǵy alańda ótkizilgen shara barysynda jol qyzmetiniń tehnıkalary men tótenshe jaǵdaılar departamentine qarasty jeke quramnyń is-qımyl kórsetilimi uıymdastyryldy. «Jıyn» dabyly boıynsha jınalǵan jeke quram men tehnıkalary tolyq daıyndyqqa keltirildi. Sharanyń ashylýyna qatysqan oblys ákimi Janseıit Túımebaev azamattyq qorǵaý qyzmetteri men qurlymdarynyń qys mezgilinde oryn alatyn tótenshe jaǵdaılarǵa ázirligin tekserdi. 
«Qys jaqyndap keledi. Sondyqtan qys mezgilinde oryn alýy yqtımal barlyq keleńsiz jaǵdaılardyń aldyn alý sharalaryn kúsheıtýimiz qajet. Bul rette negizgi kúsh Oblystyq tótenshe jaǵdaılar departamentine artylady. Desek te, bul iske basqa qurylymdyq kúshter de bir kisideı atsalysýy kerek», - dedi Janseıit Qanseıituly.
Oqý-jattyǵý stsenarıi boıynsha oblys aýmaǵynda kúrdeli meteorologııalyq jaǵdaı týyndap, aýa temperatýrasy 15 gradýstan tómendep ketedi. Qarǵa ulasqan jaýyn-shashyn nátıjesinde Saıramsý ózeni tasyp, avtokólik joldarynyń keı jerleri muzǵa oranady. Jol-kólik oqıǵasy oryn alyp, adamdar sýǵa qulap ketti. Sondaı-aq, temirjolda janar-jaǵarmaı tasymaldaıtyn vagondar relsten shyǵyp ketip, órt paıda bolady. Búgingi daıyndyq sharasynyń negizgi maqsaty - oryn alǵan keleńsizdikti tez arada joıý. Ol úshin «Saýran» demalys aımaǵynda «Qysqy kezeń jaǵdaıynda tótenshe jaǵdaılardy joıý» taqyrybynda arnaıy-taktıkalyq oqý-jattyǵý ótkiziledi dep kútilýde.
Aıta keteıik, qazirdiń ózinde oblysta qys mezgilindegi qozǵalys qaýipsizdigin qamtamasyz etý úshin 11 myń tonna tuz ben 10 myń tonna qum ázirlengen. 
