OQO-da qyryqqabat egile bastady
ShYMKENT. QazAqparat - Ońtústik Qazaqstan oblysy Maqtaral aýdanynda qyryqqabat daqylyn egý naýqany bastaldy, dep habarlaıdy QazAqparat oblys ákimdiginiń baspasóz qyzmetine silteme jasap.
Qazirdiń ózinde egistik alqaptarynda 50-den astam brıgada qurylyp, myńdaǵan adam jumysqa tartylǵan.
Aqpannyń basy qatty bolyp, egindi 1-2 aptaǵa kesh bastaǵan «Ábsattar ata» sharýa qojalyǵynyń basshysy Fazylbek Jarqynbekov mamyrǵa jetpeı ónim alýdy kózdep otyr.
«Jylyjaıda 150 myń túp qyryqabattyń kóshetin daıyndap, 30 adamnan quralǵan brıgadamen kóshet otyrǵyzýdy bastadyq. Jumysshylarǵa kúndelikti eńbek aqysyn tóleýdemiz. Negizinen daqyl 2 aıdyń kóleminde pisip, jetiledi. Sondaı-aq, 90 kúnde jetiletin surpyn da ektik. Egilgen kóshettiń ústin japqyshpen jaýyp, jaýyn-shashynnan qorǵaımyz. Eń bastysy - kútip-baptaýǵa úlken mán berilýi kerek», - deıdi F.Jarqynbekov.
Maqtaraldyq dıqandar salmaǵy 1-1,5 keliden aspaıtyn qyryqqabattyń nıderlandyq pandıon surpyn egýde. Erte pisetin ónim túrine eýropalyqtar men reseılikter tarapynan suranys kóp. 
Jalpy, qyryqqabat daqyly erte pisetindikten, maqtaraldyq dıqandar onyń artynan qaýyn-qarbyz egýge kirisedi. Osylaısha óńirdegi sharýalar 1 jylda eki ret ónim alady. Byltyrǵy jyly sáýir aıynda alǵashqy ónimin alǵan maqtaraldyq dıqandar respýblıkanyń birneshe oblysyn jáne Reseıdi qyryqqabatpen qamtamasyz etken bolatyn.
Aıta keteıik, Maqtaral aýdanynda byltyr 3 877 gektarǵa kókónis egilip, ortasha 231,3 tsentnerden 89 689 tonna ónim jınalǵan. Al, onyń 50 myń tonnadan astamy qyryqqabat ónimi bolatyn.
