OQO-da «Qymyzmuryndyq» etnofestıvali ótti
ShYMKENT. QazAqparat - Ońtústik Qazaqstan oblysynda Ádep-ǵuryp jáne salt-dástúr ortalyǵy «Qymyzmuryndyq» etnofestıvalin ótkizdi. Túlkibas aýdanynda uıymdastyrylǵan shara aıasynda qatysýshylar salt-dástúrimizdi qaıta jańǵyrtyp, jas urpaqqa úlgi etti, dep habarlaıdy QazAqparat tilshisi.
Festıval barysynda kıiz úıler tigilip, dastarhan mázirine qymyzdyń birneshe túri qoıyldy. Babymen qymyz ázirlendi. Jankúıerler de qarap qalǵan joq. Ulttyq oıyndardan saıysqa túsip, ánshiler aýyldyń alty aýyzyn aıtty.
«Bul - bolashaǵynan úmit kúttiretin jastar úshin tálim-tárbıe. Babalarymyzdan kele jatqan, keıingi urpaqqa sińetin úlken dúnıe. Sol úlken dástúrimizdi, ádet-ǵurypymyzdy, salt-sanamyzdy tek qana Ońtústik óńiri ǵana emes álemdik deńgeıde de jaqsy tanytsaq degen oıymyz bar»,- deıdi Oblystyq ádet-ǵuryp jáne salt-dástúr ortalyǵynyń dırektory Jánibek Taǵaev.
Shara barysynda jigitter jaǵy qymyz ishýden saıysqa túsip, dýmannyń kórkin qyzdyrdy. Olardyń arasynda ońtústikke saparlaı kelgen Almaty oblysynyń týmasy Nurjan Turlybekov 16 kese qymyz iship, jeńimpaz atandy.
