OQO-da qymyz ben shubattan qurǵaq sút óndirilmek
ASTANA. QazAqparat - Ońtústik Qazaqstan oblysynda qymyz ben shubattan qurǵaq sút ónimin óndiretin kásiporyn salynýda, dep habarlaıdy QazAqparat ákimniń baspasóz qyzmetine silteme jasap.
Oblys ákimi Janseıit Túımebaev Túrkistan qalasyna jasaǵan jumys sapary barysynda qymyz ben shubattan qurǵaq sút ónimin óndiretin «Golden camel group LTD» kásipornynda boldy.
Indýstrıaldy aımaqta salynyp jatqan ınvestıtsııalyq joba keler jyldyń mamyr aıynda iske qosylady. Búginde nysan qurylysynyń 75 paıyzy aıaqtalǵan. Júrgizilip jatqan qurylystyń barysymen tanysqan oblys basshysy mundaı zaýyt TMD elderinde balamasy joq ekenin aıtyp, bul jobanyń óńirimiz úshin mańyzdy ekenine toqtaldy.
«Túıe men bıeniń sútinen qurǵaq ónim daıyndaıtyn zaýyttar oblys úshin óte tıimdi. Óıtkeni óńirde túıe sharýashylyǵy damıtyn bolady. Sondaı-aq, jergilikti jurt jumyspen qamtylady. Bastysy, otandyq shıpaly ónimdi shetelge eksporttaýǵa múmkindik týady», - dedi Janseıit Qanseıituly.
Quny 7,5 mlrd teńgeni quraıtyn zaýyt bolashaqta jylyna 2500 tonna qurǵaq sút óndiretin bolady. Investıtsııalyq joba iske qosylǵanda 150-den astam azamat jumyspen qamtylady dep josparlanýda. Aldaǵy ýaqytta munda ázirlengen daıyn ónimder respýblıka naryǵynan bólek, Qytaı, Saýd Arabııa, Gonkong elderine eksporttalatyn bolady.
Budan bólek, ákim osy jyldyń shilde aıynda iske qosylǵan Oranǵaı aýyldyq okrýgindegi «Inar A.S.» jylyjaı keshenin aralap kórip, qyzanaqtyń ónimdiligin baıqady.
Aýmaǵy 0,5 gektardy quraıtyn jylyjaıdan búginge deıin 20 tonna qyzanaq alynǵan. Alda 40 tonna shamasynda ónim beretin keshende qyzanaq pisýdiń aldynda tur. Kásipker Inara Namazbaevanyń aıtýynsha, alǵashqy ónim Túrkistan bazaryna shyǵarylǵan. Quny 45 mıllıon teńgeni quraıtyn keshende 10 adam jumyspen qamtylǵan.
