OQO-da qylmystyq top otbasy múshelerin baılap, úıin tonap ketken
ASTANA. QazAqparat - Polıtseıler Saryaǵash pen Maqtaaral aýdanynda qaraqshylyq shabýyl jasaǵan qylmystyq topty ustady, dep habarlaıdy «QazAqparat» HAA Ońtústik Qazaqstan oblysy ІІD Memlekettik til jáne aqparat basqarmasyna silteme jasap.
Saryaǵash aýdandyq ІІB-niń polıtsııa bólimine jergilikti turǵyn aryzdanǵan, onda ol kórshisiniń úıine belgisiz tulǵalar qaraqshylyq shabýyl jasaǵany týraly kórsetken.
Oqıǵa ornyna kelip jetken jedel-tergeý toby betperde kıgen belgisiz tulǵalar úıge basa kóktep kirip, úı ıesiniń, onyń áıeli men balalarynyń aıaq-qoldaryn baılap, uryp-soǵyp, aqsha men altyn buıymdaryn alyp ketkenin anyqtaǵan. Qaskóıler belgisiz baǵytta boı tasalaǵan. Jábirlenýshi úı ıesi alǵan dene jaraqattary saldarynan aýrýhanaǵa túsken.
Jedel-izdestirý sharalary nátıjesinde kúdikti retinde qylmystyq top anyqtalyp, ustaldy. Olar 1982-1990 jyldary týǵan Shymkent qalasynyń turǵyndary. Qylmystyq toptyń úsh múshesi qamaýǵa alyndy. Qalǵan ekeýi izdestirilýde. Kúdiktiler buryn da isti bolǵan.
Saryaǵash aýdandyq ІІB tergeýshileri ustalǵan kúdiktilerdiń ótken jyldyń aıaǵynda Maqtaaral aýdanynda jasalǵan qaraqshylyqqa qatysy baryn dáleldedi. Polıtseıler qylmystyq toptyń osyǵan uqsas basqa da qylmystarǵa qatysy bolýy múmkindigin joqqa shyǵarmaıdy.
Qazirgi tańda atalǵan jaıt boıynsha qaraqshylyq babymen sotqa deıingi tergep-tekserý jumystary júrgizilýde.
