OQO-da qylmys sany edáýir tómendegen
ShYMKENT. QazAqparat - Ońtústik Qazaqstan oblysynda Jergilikti polıtsııa qyzmeti qoǵamdyq tártip pen qaýipsizdikti qamtamasyz etý baǵytynda birqatar is-sharalardy júzege asyrdy. Nátıjesinde jalpy qylmystyń sany 2017 jyldyń 9 aıynda 13,6 paıyzǵa tómendep otyr. Bul týraly OQO óńirlik kommýnıkatsııalar qyzmetinde ótken brıfıngte oblystyq jergilikti polıtsııa qyzmetiniń bastyǵy Ábdiǵanı Seıdýalıev málim etti, dep habarlaıdy QazAqparat tilshisi.
Ábdiǵanı Toıshyulynyń aıtýynsha, aǵymdaǵy jyldyń 9 aıynda 190 641 ákimshilik quqyqbuzýshylyq anyqtalyp, olarǵa 1 mlrd 373 mln. teńge aıyppul salynǵan. Búgingi tańda onyń 47,1 paıyzy óndirilipti.
«Erekshe toqtala ketetini, ýchaskelik polıtsııa ınspektorlarynyń jumysy. Osy ýaqytqa deıin olardyń jeke izdestirýimen ashylǵan qylmystar sany 10,7 paıyzǵa artyp otyr. Oǵan qosa anyqtalǵan quqyqbuzýshylyqtar 4,3 paıyzǵa kóbeıgen. Ýchaskelik polıtsııa ınspektorlarymen 42 865 aryz-shaǵym qaralyp, zańdy sheshimder qabyldandy», - deıdi Ábdiǵanı Seıdýalıev.
Sondaı-aq, bıyl jol-patrýldik polıtsııasy 1074 qylmysty áshkere qylǵan. Budan bólek, 205 493 ákimshilik quqyqbuzýshylyqtar anyqtalyp otyr. Atap aıtqanda, qylmys jasaǵan tulǵalardyń 70,5 paıyzyn jumyssyzdar quraıdy.
Sonymen qatar, bıyl ákimshilik qadaǵalaý belgilengen 31 azamat shartty túrde merziminen buryn bosatylǵan. Al 220 tulǵa probatsııa qyzmetine jetkizilip, olarǵa áleýmettik-quqyqtyq kómekter kórsetilipti. Aıta keterligi, aǵymdaǵy jyly jasóspirimder arasynda jasalǵan qylmystar 18,8 paıyzǵa ósken. Bul kórsetkishti tómendetý maqsatynda óńirde «Jasóspirim», «Qadaǵalaýsyz», «Túngi qaladaǵy balalar» syndy is-sharalar júrgizilýde.
