OQO-da qýyrshaq teatrlarynyń festıvali ótip jatyr
ShYMKENT. QazAqparat - Ońtústik Qazaqstan oblysynda «Orteke» V halyqaralyq qýyrshaq teatrlarynyń festıvali ótýde. «Túrkistan - Túrki áleminiń mádenı astanasy» jyly men «EKSPO 2017» Halyqaralyq kórmesi aıasynda uıymdastyrylǵan sharaǵa túrki elderiniń qýyrshaq teatrlary qatysyp otyr, dep habarlaıdy QazAqparat HAA tilshisi.
Uıymdastyrýshylardyń sózinshe «Orteke» halyqaralyq festıvali kásibı qýyrshaq ónerin kópshilikke tanytý men aımaqaralyq yntymaqtastyq, kásibı qýyrshaq óneri salasyndaǵy halyqaralyq mádenı baılanysty nyǵaıtý úshin ótkizilýde. Sondaı-aq daryndy ártister men rejısserlerdi anyqtap, olardy yntalandyrý, qýyrshaq óneri akterleriniń kásibı jáne oryndaýshylyq sheberligi deńgeıin arttyrý, otandyq qýyrshaq óneriniń damýyna jaǵdaı jasaýdy kózdeıdi.
Festıval aıasynda Túrkistan men Shymkent qalalarynda Qyrǵyz, Ázirbaıjan memlekettik qýyrshaq teatrlarynyń, Túrkııalyq Adana qalalyq mýnıtsıpaldyq teatry men jáne «Qarakóz» teatrlarynyń qoıylymdary kórsetiledi. Sonymen qatar kórermender Aqtóbe oblystyq «Alaqaı» jáne Mańǵystaý oblystyq qýyrshaq teatrlarynyń, Ońtústik Qazaqstan oblystyq qýyrshaq teatry jáne S.Qojamqulov atyndaǵy Jezqazǵan qazaq mýzykalyq drama teatry ujymdarynyń oryndaýynda qazaqstandyq jáne sheteldik avtorlardyń týyndylaryn tamashalaı alady.
Al, barlyq spektakl kórsetilimderiniń quramyna rejısser, Astana qalasy Qýyrshaq teatrynyń kórkemdik jetekshisi, QR eńbek sińirgen ártisi Quralaı Eshmuratova, UNİMA Halyqaralyq qýyrshaq teatrlary odaǵynyń Túrkııadaǵy múshesi, synshy, qýyrshaq teatrlaryn zertteýshi-jazýshy Ozhan Mevlýt, Reseıdiń eńbek sińirgen ártisi, Orynbor oblystyq qýyrshaq teatrynyń kórkemdik jetekshisi Vadım Smırnov, Almaty qalasy Memlekettik qýyrshaq teatrynyń aktrısasy, QR eńbek sińirgen artısi Sabıla Abýeva, Moldovadaǵy Gagaýyz ulttyq teatrynyń dırektory Mıhaıl Konstantınov tórelik etýde.
