OQO-da qutqarýshylar ózenge batqan balany tórt kúnnen beri izdestirýde
ShYMKENT. QazAqparat - Ońtústik Qazaqstan oblysynda qutqarýshylar ózenge batqan balanyń denesin izdestirýde. 13 jastaǵy bala tórt kún buryn Saıram ózenine aǵyp ketken bolatyn, dep habarlaıdy QazAqparat HAA tilshisi.
Búginde izdestirý sharalaryna 14 qutqarýshy men 4 tehnıka jumyldyrylǵan. Qutqarýshylarǵa jergilikti turǵyndar men taǵy 50 erikti jas kómektesip jatyr. Kýágerlerdiń sózinshe Saıram aýdanynda turǵan bala kópirdiń ústinde oınap júrip, baıqaýsyzda sýǵa qulap ketken. Qaıǵyly jaǵdaı oryn ala salysymen jergilikti jurt qutqarýshylardy shaqyryp, bir saǵattan keıin-aq izdestirý jumystary bastalyp ketipti.
«2004 jyly týǵan Elmurat Myrzametovty izdeý bizge qıynǵa soǵýda. Óıtkeni ózen sýynyń aǵysy qatty, onyń ústine sýdyń ishinde beton plıtalary kóp. Sondaı-aq ózenniń ishinde qoqys zattary kóp bolyp, qutqarýshylardyń aıaǵyna oralýda. Soǵan qaramastan tórt kúnnen beri balany izdeýdemiz», - deıdi OQO TJD Qutqarý jasaǵy bóliminiń bastyǵy Nurjan Ásibekov.
Al, kúni keshe qutqarýshylar eki aı buryn Arys ózenine batyp ketken 25 jastaǵy turǵynnyń denesin sýdan shyǵaryp aldy. Buǵan deıin eki ret júrgizilgen izdeý sharalary nátıje bermegen. Bolmaǵan soń qutqarýshylar qaıtyp ketken. Keıinnen marqumnyń týystary taǵy aryzdanyp suranǵan soń úshinshi ret izdeý sharalary júrgizilgen bolatyn. Osy mańda mal baǵatyn shopan Bestoranǵyl aýyly aýmaǵynan ótetin Arys ózeninde er azamattyń denesin kórgendigi týraly qutqarýshylarǵa habarlaǵan. Osydan keıin qutqarýshylar er azamattyń denesin oqıǵa ornynan 35 km jerinde taýyp aldy.
Aıta keteıik, jyl basynan beri óńirde sýǵa batqandardyń sany 16 adamdy quraǵan. Onyń 10-y kámelet jasyna tolmaǵan balalar bolyp otyr.
