OQO-da qutqarýshylar qar qursaýynda qalǵan aýyldarǵa dárigerlerdi jetkizdi
ShYMKENT. QazAqparat - OQO-da qutqarýshylar qar qursaýynda qalǵan aýyldarǵa dárigerlerdi apardy. Naýqastar turatyn aýyldarǵa joldar jabylyp, jedel-járdem kóligi jete almaı qalǵan bolatyn, dep habarlaıdy QazAqparat HAA tilshisi.
Báıdibek aýdanyna qarasty Báıdibek ata aýylynda 26 jastaǵy kelinshek qatty aýyryp, jedel járdem shaqyrtqan. Alaıda aýdandyq aýrýhananyń dárigerleri naýqas áıelge jete almapty. Sebebi, aýyl arasyndaǵy joldar kóktaıǵaq, ári qar basyp qalǵan. Aýdan ortalyǵynan dáriger shaqyrta almaǵan aýyl turǵyndary amalsyzdan qutqarýshylardyń kómegine júgingen.
Sebebi, syrqattanyp qalǵan jannyń jaǵdaıy ýaqyt ótken saıyn aýyrlaǵan. Keshki 20.45 shamasynda OQO TJD qarasty qutqarýshylar jasaǵynyń 6 adamnan quralǵan jeke quramy eki tehnıkamen Báıdibek aýdandyq aýrýhanasyna jol tartady. Jolda boran turyp, júrý qıyndyq týǵyzǵandyqtan «Trekol» tehnıkasymen jetýge týra kelipti. Dittegen jerge túngi 23.05-ter shamasynda baryp, dáriger-hırýrgtarymen birge shalǵaıdaǵy aýylǵa attanǵan. Tańǵy 6.35-ter shamasynda Báıdibek atadaǵy turǵyn úıge jetken dárigerler kelinshektiń densaýlyǵyn tekserip, ony aýdandyq aýrýhanaǵa jatqyzý qajet degen sheshimge kelgen. Sóıtip qutqarýshylar syrqat jandy aýdan ortalyǵyna alyp ketedi.
Jol jónekeı Aqtas aýylynda 13 jastaǵy jasóspirim soqyrshek belgilerimen qatty aýyryp jatyr degen habarlama túsken. Tótenshe jaǵdaılar qyzmetkerleri dárigerlerdi alyp jolaı sol aýylǵa soǵypty. Balany qarap shyqqan medıtsına qyzmetkerleri ony da aýdandyq aýrýhanaǵa jetkizý qajettigin alǵa tartady. Eki birdeı naýqasty da qutqarýshylar der kezinde Shaıan aýylyndaǵy emdeý mekemesine jetkizgen. 
Aıta keteıik, bıylǵy jyly ońtústik óńirinde qys qatty bolyp, kólikterdiń júrip turýy qıyndaǵan. Ásirese Báıdibek, Sozaq, jáne Túlkibas aýdandaryndaǵy asýlarda joldar jabylyp, qar qursaýynda qalǵan jolaýshylar qutqaryldy. Báıdibek aýdanynda birneshe naýqas qutqarýshylardyń kómegimen aýdandyq aýrýhana jetkizildi.
