OQO-da qulaǵan ǵımarat astynda qalǵan órt sóndirýshiniń jaǵdaıy aýyr
ShYMKENT. QazAqparat - Shymkentte órtengen eski ǵımarattyń qabyrǵasy qulap, astynda bir órt sóndirýshi qalyp qoıdy. Qazir onyń jaǵdaıy aýyr. Dárigerler tolyq medıtsınalyq tekserý júrgizip bolǵan soń, ota jasaıtynyn aıtady, dep habarlaıdy QazAqparat HAA tilshisi.
Órt sóndirý qyzmetkeri qazir Shymkent qalalyq jedel-járdem aýrýhanasynyń jansaqtaý bólimine jatqyzyldy. Ázirge belgilisi onyń eki jambasy synyp, bir qoly kúıip qalǵan.
«Bizge óndiristik jaraqattan keıin órt sóndirý qyzmetkeri tústi. Kelip túskendegi jaǵdaıy óte aýyr bolatyn. Keýde jaraqaty bolǵan, jambas súıekteri syný jaraqaty bolǵan jáne sol jaq qolynyń kúıgen jaraqattary bar. Alǵan jaraqatynyń aýyr bolýyna baılanysty jansaqtaý bólimine jatqyzyldy. Barlyq tıisti kómek kórsetildi. Qýyǵy jarylyp ketken degen de kúmán bolyp jatyr. Rastalsa tez arada ota jasalady»,-dedi aýrýhananyń dáriger travmatology Nurlybek Pametov.
Belgili bolǵandaı, 35 jastaǵy órt sóndirýshi órtti óshirip jatqan kezde bir qabyrǵa qulap, ony basyp qalǵan. Kýágerlerdiń sózinshe ol úıindiniń astynda 15-20 mınýttaı jatyp qalǵan. Keıin basqa qyzmetkerler ony shyǵaryp alǵan. Bizge túsken beınematerıalda ony áriptesteri qutqaryp jatqan sáti beınelenedi.
Al, óńirdiń tótenshe jaǵdaılar qyzmetkerleri bolsa órttiń ne sebepti shyqqanyn áli bile almaı otyr. Qazir tekserý sharalary júrgizilip jatqanyn aıtady.
«Arnaıy komıssııa qurylady. Sol komıssııanyń sheshimi boıynsha zerdeleý jumystary júrgiziledi. Órttiń naqty sebepteri anyqtalyp, qosymsha habarlaıtyn bolamyz»,- deıdi oblystyq TJD-nyń bas mamany Zarıpa Turysbekova.
Eske sala keteıik, búgin tańǵa jýyq Shymkenttegi buryn advokattar otyrǵan eski ǵımarat órtenip, nysannyń kúl-talqany shyqty. Qyzyl jalynǵa oranǵan ekiqabatty mekeme tolyǵymen janyp ketti. Jarty bóligi qulap, shatyry opyrylyp ortasyna tústi. Jalyn 517 sharshy metr jerdi sharpyǵan. Órttiń kúshti bolǵany sonshalyq, tótenshelikter qyzyl jalynmen eki saǵattan asa ýaqyt boıy arpalysty. Órt sóndirý jumystaryna departamenttiń 113 jeke quramy men 17 tehnıkasy, 2 sý tasý kóligi jumyldyryldy. Jalyndy aýyzdyqtaý kezinde bir órt sóndirýshi zardap shekken bolatyn. 
