OQO-da QR Tuńǵysh Prezıdenti kúnine oraı dóńgelek ústel ótti

ShYMKENT. QazAqparat - Ońtústik Qazaqstan oblysynda 1 jeltoqsan - Qazaqstan Respýblıkasy Tuńǵysh Prezıdenti kúni merekesine oraı «dóńgelek ústel» májilisi ótti. Qazaqstan halqy Assambleıasy oblystyq fılıaly janyndaǵy ǵylymı-sarapshylyq toptyń uıymdastyrýymen ótken basqosý «Qazaqstan halqy Assambleıasy - Elbasy qurǵan biregeı ınstıtýt» taqyrybynda órbidi , dep habarlaıdy QazAqparat tilshisi.

Shymkent qalasyndaǵy «Qazaqstan halqy Assambleıasy» ǵımaratynda ótken jıynǵa oblystyq assambleıa janyndaǵy ǵylymı-sarapshylyq top músheleri, ǵalymdar, oblystyq etnomádenı birlestikter men assambleıa janyndaǵy qurylymdardyń jetekshileri, dinı konfessııalardyń ókilderi, «Nur Otan» partııasynyń qyzmetkerleri, buqaralyq aqparat quraldarynyń ókilderi qatysty. Májilisti  oblystyq  Qazaqstan halqy Assambleıasy tóraǵasynyń orynbasary, oblys ákimi apparaty assambleıa hatshylyǵynyń meńgerýshisi Muratáli Qalmuratov sóz sóılep ashty.

«Tuńǵysh Prezıdent kúni» merekesiniń bekitilýi - halyqtyń óz kóshbasshysyna degen qurmeti. Bul osydan 26 jyl buryn Nursultan Nazarbaevty Prezıdent etip saılaǵan halyqtyń sátti jasalǵan tańdaýyna degen qurmet. Táýelsizdiktiń birinshi kúninen bastap Memleket basshysy elimizdegi alýan túrli mádenıetter men etnostar arasynda tózimdilik qarym-qatynasty qalyptastyrýdyń maqsaty men dáıekti saıasatyn ustanýdy usyndy», - dedi Muratáli Qalmuratov.

Ol sondaı-aq jalpyulttyq birlik salasyndaǵy memlekettik saıasattyń mańyzdylyǵyna, Elbasynyń tarıhı sheshimderine keńinen toqtaldy.  Májilis aıasynda Elbasy týraly kitap kórmesi uıymdastyrylyp, arnaıy ázirlengen beınefılm kórsetildi.

Sondaı-aq, oblystyq QHA Qoǵamdyq kelisim keńesiniń tóraǵasy Orynbaı Rahmanberdıev pen birqatar ǵalymdar jáne oblystyq koreı etnomádenı birlestiginiń tóraıymy Roza Pak baıandama jasady. Memleket basshysynyń jalpyulttyq birlik salasyndaǵy salıqaly saıasatyn, álemdik arenadaǵy bıik bedelin, el ekonomıkasyn arttyrý jolyndaǵy jasampaz eńbekterin sóz etti.  Aıta keteıik, Elbasy N.Nazarbaevtyń bastamasymen 1995 jyly qurylǵan Qazaqstan halqy Assambleıasy osy jyldar ishinde qazaqstandyqtardyń júreginen oryn alyp, ómirsheńdigin kórsetti. Búginde Parlamentte etnos ókilderinen saılanǵan depýtattardyń zań shyǵarýshylyq úderiske qatysýy resmı turǵyda bekitilgen álemdegi jalǵyz memleket ekendigi májiliste aıryqsha aıtyldy.