OQO-da kóshi-qon zańdylyǵyn buzǵan 2 myńǵa jýyq sheteldiktiń isi sotqa joldanǵan
ShYMKENT. QazAqparat - Ońtústik Qazaqstan oblysynda ótken jyly kóshi-qon zańdylyǵyn buzǵan 2 myńǵa jýyq sheteldiktiń isi sotqa joldanǵan. Zańbuzýshylyqqa jol bergen 763 kelimsek el aýmaǵynan shyǵaryldy, - dep habarlaıdy QazAqparat HAA tilshisi.
Shymkent qalasynyń mamandandyrylǵan ákimshilik soty ótken jyly atqarǵan jumystaryn qorytyndylap, baspasóz máslıhatyn ótkizdi. Sot tóraǵasy Ábdýmútálip Bekturǵanovtyń sózinshe, bir jylda kóshi-qon zańdylyǵyn buzǵan 808 sheteldik qamaýǵa alynyp, 315 azamatqa ákimshilik aıyppul salyndy. Zańbuzýshylyqqa jol bergenderdiń jartysyna jýyǵy kórshi ózbek eliniń azamattary eken. Sondaı-aq, 525 aýǵandyqqa qatysty shara qoldanylǵan.
«Qazirgi tańda kóshi-qon zańdylyǵyna qatysty isterdi qaraý máselesi mańyzdy bolyp tur. Máselen, ótken jyly sheteldikterge qatysty 2 myńǵa tarta ákimshilik is qozǵalǵan. Negizinen kelimsekter bizdiń elge zańsyz joldarmen keledi, eshbir qujatsyz jumys isteıdi»,- deıdi sot tóraǵasy.
Budan bólek, sot 9014 is boıynsha ákimshilik jaza qoldanyp, 3156 kináli tulǵa qamaýǵa alynǵan. 3837 azamatqa qatysty aıyppul salynypty. Zańbuzýshylar qatarynda jol erejesin buzǵan júrgizýshiler men qoǵamdyq tártipti saqtamaǵandar da bar. Máselen, 1214 júrgizýshi kýáliginen aıyrylsa, taǵy 27 azamatqa qatysty sot sheshimi shyqqan.
