OQO-da kóshbasshy áıelder ortalyǵy ashyldy
ShYMKENT. QazAqparat - Ońtústik Qazaqstan oblysy Saıram aýdanynda kóshbasshy áıelder ortalyǵy ashyldy. Bul názik jandylarǵa saıasatta belsendilik tanytyp qana qoımaı, basshylyq qyzmetke beıimdelýine múmkindik beredi. Alǵashqy basqosýlaryn ótkizgen aýdannyń isker áıelderi ortalyqtyń negizgi baǵytyn belgilep, aldaǵy maqsat-mindetterin ekshedi, dep habarlaıdy QazAqparat HAA tilshisi.
Statıstıkalyq zertteýlerge súıensek, elimizde sońǵy 10 jylda jetekshilik oryndarda otyrǵan áıelderdiń qatary eki esege ósken. Ásirese, aýdan ákimderi orynbasarlarynyń dárejesinde názikjandylar basym. Biraq, bul málimetter Qazaqstannyń coltústik aımaqtary men shyǵys bóligine ǵana tán. Qyz-kelinshekterdiń basshylyq qyzmetke aralasýynan Ońtústik Qazaqstan oblysy kósh sońynda. Sondyqtan ońtústiktiń isker áıelderine qoldaý qajet. Jańadan ortalyqty ashqan mamandardyń sózinshe endi názik jandylarǵa jan-jaqty qoldaý kórsetiletin bolady. Olardyń qoǵamdyq ómirdegi belsendiligin arttyrý da josparda bar. Degenmen sala mamandary aýdandaǵy áıelderdiń kóshbasshylyq qabileti artatynyna senimdi.
«Qoǵam men memleket isine kelgende qyz-kelinshekter qaýymynyń belsendiligi mol. Jaýapkershiligi de joǵary. Memlekettik qyzmette de áıelderdiń úles salmaǵy artyp otyr. Al, sońǵy ýaqytta olar qoǵamdyq jumysqa da jıi aralasyp júr. Biz sondaı qyz-kelinshekterdiń tizimin jasap, ortalyqqa shaqyratyn bolamyz. Arnaıy semınar-keńester uıymdastyryp, kóshbasshylyq qabiletterin arttyrýǵa yqpal etemiz», - deıdi Saıram aýdandyq kóshbasshy áıelder ortalyǵynyń múshesi Raýshan Qydyrbaeva.
