OQO-da «Kórshige izet» kúni aıasynda túrli ulttyń ókilderi bas qosty

ShYMKENT. QazAqparat - Búgin Ońtústik Qazaqstan oblysynda «Kórshige izet» aıasynda túrli ult ókilderiniń basqosýy ótti. «Qoǵamdyq kelisim» mekemesi uıymdastyrǵan jıynǵa óńirdegi etnomádenı birlestikterdiń, Qoǵamdyq kelisim men Analar keńesteriniń músheleri, ǵylymı-sarapshylyq toptyń ókilderi jáne óńirdegi «Qazaqstan halqy Assambleıasy» kafedralarynyń oqytýshylary qatysty, dep habarlaıdy  QazAqparat tilshisi.

Alǵys aıtý kúnine oraı qolǵa alynǵan onkúndik aıasynda uıymdastyrylǵan jıynda  kórshiler arasyndaǵy ózara qurmet pen syılastyqty jańa satyǵa kóterý máselesi sóz boldy.  Shymkent qalasy ortalyq meshitiniń naıb ımamy Nurjan Qasymbek pen eńbek ardageri, sondaı-aq túrli birlestik basshylary mańyzdy shara jaıynda  sóz sóılep, oı-pikirlerin ortaǵa saldy. Búginde qaladaǵy kórshilerdiń amandasýdan al, aýyldaǵy kórshilerdiń aralasýdan qalǵanyn aıryqsha aıtty.
 

«Bıyl Alǵys aıtý kúni oblysta erekshe atalyp ótýde.  20 aqpan men 1 naýryz aralyǵyndaǵy ár kúnge eldi berekeli birlik pen yrysty yntymaqqa úndeıtin ataýlar berilip, sonyń aıasynda josparly jumys júrgizilýde. Al, «Kórshige izet» kúni dep belgileýdiń astarynda úlken mán bar. Tarıh túbine tereńdesek, ata-babamyzdyń qudaı qosqan kórshisimen árdaıym tatý turǵanyn ańǵaramyz. «Kórshi aqysy - Táńir aqysy», «Týys - atadan, kórshi - Alladan» deıtin qanatty sózder men maqal-mátelder bosqa aıtylmasa kerek»,- dedi óńirdegi «Qoǵamdyq kelisim» mekemesiniń basshysy Erbol Baıqonaqov.
 

Aıta keteıik,  «Kórshige izet» kúni aıasynda osy mazmundas jıyndar  oblys aýmaǵyndaǵy barlyq aýdan, qala ortalyqtarynda ótti.