OQO-da kóp balaly analardyń qatary 100 myńǵa jýyqtady
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev qyz-kelinshekter men aıaýly analardy «8 naýryz - Halyqaralyq áıelder kúni» merekesimen quttyqtady. Meıram qarsańynda názik jandylarǵa arnaıy aq dastarhan jaıylyp, burymdylardyń qurmetine «Áıel - ana - ómirdiń ózegi» atty kontserttik baǵdarlama uıymdastyryldy, dep habarlaıdy QazAqparat tilshisi.
Saltanatty sharaǵa oblys ardagerleri men zııaly qaýym ókilderi, Oblystyq Assambleıa ókilderi men oblys ákiminiń janyndaǵy áıelder isteri jáne otbasylyq - demografııalyq saıasat jónindegi komıssııa músheleri, oblystyń qala-aýdandarynan túrli salada qyzmet etetin qyz-kelinshekter jalpy sany 300-ge jýyq názik jandy qatysty. Beıresmı jıyndy óńir basshysy ashyp berip, arý analarǵa arnap quttyqtaý sóz sóıledi.
«Qurmetti, ardaqty analar men aıaýly arýlar! Sizderdi tól merekelereńizben shyn júrekten quttyqtaımyn! Bizdiń qoǵamymyzda áıel tek otbasynyń bereke-birligin oılaıtyn tulǵa ǵana emes, ol memlekettik qyzmet pen qoǵamdyq iste de, kásipkerlik pen tálimgerlikte de tamasha tabystarǵa qol jetkize otyryp, saıası máselelerge belsene aralasatyn qoǵam múshesi. Elimizde kóp balaly analar sany boıynsha óńirimiz kósh bastap tur. Búginde oblysta kóp balaly analarymyz 98 600-den asty. Olardyń 3998-i «Batyr analar», 16361-i «Altyn alqa», 42 724-i «Kúmis alqa» ıegeri. Al, 6906 ana І-shi jáne ІІ-shi dárejeli «Ana Dańqy» ordenimen marapattalǵan. Eldiń ósip, órkendeýine erekshe úles qosyp otyrǵan jandar qashanda aman bolsyn», - dedi Janseıit Qanseıituly.
Merekelik jıynda aımaq basshysy úıdiń de, túzdiń jumysyn qatar alyp, qoǵamda aıryqsha belsendiligimen kózge túsip júrgen 33 áıeldi marapattady. Onyń 5-ne «Oblysqa sińirgen eńbegi úshin» tóbelgisi berilse, 14-ne Ońtústik Qazaqstan oblysy ákiminiń Gramotasyn, 9-y oblys ákiminiń Alǵys hatyn aldy. Al, 5 ananyń keýdesine «Altyn alqa» tósbelgisi taǵyldy. Sondaı-aq, ákim saltanatty sharaǵa kelgen basqa da áıelderge syı-sııapat jasady.
Aıta keteıik, oblys kóleminde aıtýly kúnge oraı 360 merekelik is-shara uıymdastyrý josparlanǵan. Bul kúni ystyq lebizin bildirgen aımaq basshysynyń atynan qosymsha kóp balaly analarǵa, soǵys jáne eńbek ardageri atanǵan názik jandylarǵa, jalpy sany 300-den astam azamatshaǵa syılyqtar tabystalyp, qurmet kórsetiledi.
