OQO-da Konstıtýtsııa kúnine oraı birqatar azamattar oblys ákiminiń alǵys hatymen marapattaldy
ASTANA. QazAqparat - Búgin Shymkent qalasyndaǵy oblystyq orys drama teatrynda Qazaqstan Respýblıkasynyń Konstıtýtsııa kúni merekesine arnalǵan «Aıbary asqaq - Ata zań» saltanatty is-sharasy ótti. Merekelik jıynǵa qatysqan Ońtústik Qazaqstan oblysynyń ákimi Janseıit Túımebaev barsha óńir jurtshylyǵyn merekemen quttyqtap, 15 azamatty oblys ákiminiń gramotasy jáne alǵys hatymen marapattady, dep habarlaıdy oblystyq ákimdiktiń baspasóz qyzmeti.
Óz quttyqtaý sózinde óńir basshysy Konstıtýtsııa - birligi men yntymaǵy jarasqan eldigimizdiń buljymas baǵdary, kemel keleshegimizdiń kepili ekenin atap ótti.
«Halyqtyń ózi daýys berip, qabyldaǵan Ata Zańymyz órkenıetti memleketterdiń barlyǵyna tán demokratııalyq qaǵıdalarmen tolyq qamtyldy. Konstıtýtsııa birligimizdiń turaqtylyǵyn, memlekettik qurylym men elimizdiń tutastyǵyn bekitip berdi. Árbir azamattyń ózin teń sezinýine jáne quqyqtaryn saqtaýyna berik negiz boldy. Jasampaz jańa dáýirge jol ashty. Elimizdiń jetken jetistigi men alǵan belesi osy tuǵyrly Konstıtýtsııamyzdyń arqasynda múmkin boldy»,-dedi J.Túımebaev.
Merekelik shara «Ata Zań - azattyqtyń aıǵaǵy, táýelsizdiktiń tuǵyry» atty sahnalyq kórinis pen «Táýelsizdik tańy» áni, «Baqytty el - Baqytty otbasy» sazdy horeografııalyq qoıylym, «Qýatty Armııa - Qýatty Qazaqstan» sazdy patrıottyq sherýi syndy kontserttik baǵdarlamamen jalǵasyn tapty.
Jańa memleketimizdiń quqyqtyq negizin aıqyndaǵan Konstıtýtsııamyzdyń qabyldanǵanyna bıyl 22 jyl tolyp otyr.
