OQO-da kóńildesiniń pornografııalyq beınejazbasyn áleýmettik jelige júktegen turǵyn sottaldy
ShYMKENT. QazAqparat - Ońtústik Qazaqstan oblysynda kóńildesinen 980 myń teńge bopsalaǵan turǵyn sottaldy. Saryaǵash aýdandyq soty pornografııalyq materıaldardy áleýmettik jelige júktep, áıeldiń ar-namysyna tıgen azamatty 4 jyl merzimge bas bostandyǵynan aıyrdy, dep habarlaıdy QazAqparat HAA tilshisi.
Saryaǵash aýdanynyń 34 jastaǵy turǵyny áleýmettik jelide bir boıjetkenmen tanysyp, keıin ony qonaqúıge shaqyrǵan. Sóıtip, ekeýi Qaplanbek aýylynda ornalasqan qonaq úılerdiń birinde kezdesedi. Onymen jynystyq qatynasqa túsken soń, barlyǵyn baıqatpaı uıaly telefonynyń beınejazbasyna túsirip alypty. Sońynan kóńildesine habarlasyp, 800 000 teńge talap etken, «bermegen jaǵdaıda ekeýi jynystyq qatynasqa túsken kezdegi jasyryn túsirilgen beınejazbany ǵalamtorǵa jarııalap, masqaralaımyn» dep, qorqytqan.
Jurtqa masqara bolýdan qoryqqan áıel bopsalaýshyǵa bólip júrip 700 myń teńge berýge májbúr bolǵan. Alaıda, ońaı jolmen oljaly bolǵan jigit munymen qanaǵattanbaı, jarty jyl ótken soń taǵy qýlyqqa kóshedi.
«Ol kóńildesiniń atynan «VKontakte» áleýmettik jelisinen jeke paraqsha ashyp, jasyryn túsirilgen beınejazbany, fotosýretterdi sonda júktegen. Keıinnen ony óshirý úshin taǵy da 500 myń teńge aqsha talap etken. Bermegen jaǵdaıda áleýmettik jelidegi jalańash sýretterin óshirmeımin dep talap qoıypty», - deıdi Saryaǵash aýdandyq prokýratýrasynyń aǵa prokýrory Álı Nurlybaev.
Amaly qalmaǵan jábirlenýshi ishki ister organdaryna aryzdanady. Polıtseıler bopsalaýshyny 280 myń teńgeni alyp jatqan kezinde qolǵa túsirgen. Osylaısha tórt balanyń ákesi ustalyp, oǵan qatysty tergeý sharalary júrgizilgen. Bes aıǵa sozylǵan tergeý barysynda aıyptalýshynyń qylmystyq áreketi dáleldendi.
Іsti qaraǵan Saryaǵash aýdandyq soty aıyptalýshyny Qylmystyq Kodekstiń 311, 194, 147 baptary boıynsha kináli dep taýyp, ony 4 jyl merzimge bas bostandyǵynan aıyrdy. Jazasyn jalpy tártiptegi kolonııada óteý belgilendi. Sondaı-aq sottalýshynyń múlki tárkilenetin boldy.
