OQO-da kómirqyshqyl gazy óndirilmek
ASTANA. QazAqparat - Ońtústik Qazaqstanda shyny ydystaryn shyǵaratyn «Evrokrıstall» zaýyty jumys isteý aıasyn keńeıtýdi qolǵa alyp, kómirqyshqyl gazyn óndirýdi bastamaq, dep habarlaıdy ákimniń baspasóz qyzmeti.
Ol úshin kásipkerler arnaıy ıtalıandyq qurylǵylardy satyp alýdy josparlap otyr. Zaýyt qojaıynynyń málimetinshe, kómirqyshqyl gazyn sýsyndardy gazdaý úshin paıdalaný kózdelip otyr.
Barshaǵa belgili, búginde «Evrokrıstall» seriktestigi shyny ydystar shyǵarý isimen tanymal. Ondaǵy óndiriletin ónimderdi alkogoldik jáne gazdalǵan sýsyndar men shyryndar, sút pen dári-dármekter shyǵaratyn zaýyttar qoldanýǵa múddeli. Munda túrli qalypta - 200 ml-den 3 lıtrge deıingi tússiz jáne jasyl tústi bótelkeler men qutylar ázirlenedi. Osynaý ónimderge Qazaqstannyń barlyq aımaǵy men Qyrǵyzstannan tapsyrystar kelip túsýde.
Eske sala ketsek, «Ońtústik» ındýstrıaldy aımaǵynan ashylǵan shyny ydystar shyǵarýshy zaýyt tarıhy 2014 jyldan bastaý alady. Sol kezde jylyna 70 mln. bótelke shyny ydystaryn óndirýge qaýqarly zaýyttyń І kezeńi jumysyn bastaǵan bolatyn. 2016 jyly óndiristiń ІІ kezeńi iske qosylyp, bir jyldaǵy jalpy qýattylyq 200 mln. bótelkege shyqty.
Aıta ketý kerek, shyny ydystar óndiretin zaýytta álemniń jetekshi óndirýshileriniń (Haıe, Germanııa; Sanjın-Emhart, Kıtaı-Shveıtsarııa) zamanaýı qurylǵylary ornatylǵan. Olardyń ereksheligi sol, baqylaýshy máshıneler óndirilgen ónimderdi muqııat tekserip, qıraǵan áınekter men aqaýy bar ydystardy anyqtap, óndiriske keri qaıtarady. Sonymen birge, onda shyny ónimderdi qabyldaý men joıý protsesteri avtomattandyrylǵan.
Áınekterdi óndirý jumysynda elimizdiń jer qoınaýynan alynatyn kvarts qumdary men dala shpaty, dolomıt, áktas, bor, mıkrokaltsıt syndy shıkizattar qoldanylady. Qalǵan shıkizattardy zaýyt basshyly shetelden aldyrady.
