OQO-da kómir jetispeýshiligi joq
ShYMKENT. QazAqparat - Ońtústik Qazaqstan oblysynda kómir jetispeýshiligi joq. Kún saıyn orta eseppen 2,5 myń tonna kómir tasymaldanýda, dep habarlaıdy óńir basshysynyń baspasóz qyzmeti.
Búgingi tańda oblystaǵy arnaıy bazalarda 19 myń tonna kómir qory bar. Buǵan QR Energetıka mınıstrliginiń tapsyrmasyna sáıkes Atomdyq jáne energetıkalyq qadaǵalaý men baqylaý komıtetiniń Ońtústik Qazaqstan oblysy boıynsha aýmaqtyq departamenti tekserý barysynda kóz jetkizildi.
Qazirgi kezde oblys ákimdigimen kómir máselesi kúndelikti qadaǵalaýǵa alynyp, kezekshilik uıymdastyrylǵan.
Aıta keteıik, Ońtústik Qazaqstan oblysynyń 2017-2018 jyldardaǵy jylý berý maýsymyna turmystyq-sharýashylyq jaǵdaılarǵa kómir otynynyń qajettiligi 1 mln tonnany quraıdy.
Búgingi kúnge tasmaldanǵan kómirdiń kólemi 874 myń tonnaǵa ıaǵnı, 88 paıyzǵa jetip otyr. Onyń 750 myń tonnasy tuǵyndardyń qajettiligine jumsalsa, 250 myń tonnasy jylyjaılarda paıdalanylady. Osy tasymaldanǵan kómir kóleminen qazirgi tańda temir jol stantsııalaryndaǵy qoımalarda 19 myń tonna qory bar.
«Tekserý nátıjesinde Shymkenttegi temir jol stantsııasynda 2,6 myń tonna, Túrkistandaǵy stantsııada 1,4 myń tonna, Otyrar aýdanynda 800 tonna, Saryaǵash aýdanynda 13 myń tonna, Mankentta 1,2 myń tonna, Lengir qalasynda 1 myń tonna kómir qory bar ekeni anyqtaldy. Sonymen qatar, oblysqa kúndelikti orta eseppen 2,5 myń tonna kómir tasymaldanýda», - deıdi Atomdyq jáne energetıkalyq qadaǵalaý men baqylaý komıtetiniń Ońtústik Qazaqstan oblysy boıynsha aýmaqtyq departamentiniń basshysy Nurman Shilderhanov.
Oblystyq energetıka jáne turǵyn úı-kommýnaldyq sharýashylyq basqarmasy «Qazaqstan temir joly» kásipornymen birlesip, kómir tasymaldaý barysyna kúndelikti monıtorıng júrgizip otyr.
