OQO-da kólik apaty: Júrgizýshi oqıǵa ornynan qashyp ketti
ShYMKENT. QazAqparat - Ońtústik Qazaqstan oblysynda Jibek joly-Jetisaı tasjolynda jol-kólik oqıǵasy bolyp, 10 adam zardap shekti. 1 adam oqıǵa ornynda kóz jumdy, dep habarlaıdy QazAqparat tilshisi.
Belgili bolǵandaı, «Man» júk kóliginiń júrgizýshisi qarsy baǵytqa shyǵyp ketip, «Foltsvagen-Passat» avtokóligimen soqtyǵysqan. Júk kóliginiń júrgizýshisi jol-kólik oqıǵasy ornynan qashyp ketken. Al, «Foltsvagen» avtokóliginiń 67 jastaǵy júrgizýshisi aýyr jaraqattan, oqıǵa ornynda kóz jumdy. Taǵy 9 jolaýshy, onyń ishinde 11 jáne 15 jastaǵy eki bala alǵan dene jaraqattarymen aýrýhanaǵa jetkizildi. Dáriger zardap shekkenderdiń beseýin úıine qaıtarǵan. Atalǵan jol kólik oqıǵasy boıynsha Qylmystyq kodekstiń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha is qozǵalyp, júk kóliginiń júrgizýshisine izdeý jarııalandy.
Jedel-izdestirý sharalarynyń nátıjesinde jasyrynyp júrgen júrgizýshi kóp uzamaı ustaldy. Ol Saryǵash aýdanynyń 1980 jyly týylǵan turǵyny bolyp shyqty. Qazir kúdikti qamaýǵa alynyp, birneshe sot-medıtsınalyq saraptama taǵaıyndaldy. Sotqa deıingi tergeý amaldary júrgizilýde. Óńirdiń tártip saqshylary jol-kólik oqıǵasynyń barlyq mán-jaıyn anyqtaýda.
