OQO-da qoqysty suryptaıtyn zaýyttar qarqyndy jumys isteýde
ASTANA. QazAqparat - Elbasynyń bıylǵy Joldaýynda qaldyqtardy qaıta óńdep, halyq ıgiligine jaratý - eldiń bolashaǵyna degen qamqorlyq ekendigin aıtty. Bul másele Ońtústik Qazaqstan oblysynda sheshimin taýyp otyr, dep habarlaıdy oblystyq ákimdiktiń baspasóz qyzmeti.
Aıtalyq, Shymkent qalasynda jınaqtalatyn qoqys qaldyqtary Aqtas-1 eldi mekeni aýmaǵynda ornalasqan turmystyq qaldyqtar polıgonyna tasymaldanyp otyr.
Búgin bul týraly OQO óńirlik kommýnıkatsııalar qyzmetinde ótken brıfıngte oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ilıas Quramysov málim etti.
Aıta keterligi, polıgon janynan jyldyq qýattylyǵy 200 myń tonnany quraıtyn qoqys suryptaý zaýytyn «Tsesnabank» pen «Tehnologııa-21» ınvestorlary 2017 jyldyń kúzinde iske qosyp, jumystaryn bastaǵan bolatyn. Ótken jyly suryptalyp kádege jaratýǵa baǵyttalǵan qaldyqtardyń kólemi Shymkent qalasy boıynsha 9 paıyzdy quraǵan.
Budan bólek, atmosferalyq aýaǵa lastaǵysh zattardyń shyǵaryndylaryn azaıtý maqsatynda Shymkent qalasy ákimdigimen jáne kólik tasymaldaýshylar arasynda qoǵamdyq transporttardy gaz otynyna aýystyrý boıynsha memorandým túzilgen bolatyn.
«Memorandým negizinde aýadaǵy zııandy zattardy azaıtý úshin qala boıynsha birneshe avtogaz stantsııalary paıdalanýǵa berildi. Máselen, 2015-2017 jyldary aralyǵynda gaz otynymen júretin 300 jańa avtobýs satyp alynǵan bolatyn. 2020 jylǵa qaraı 2724 avtobýstyń 1000 danasyn, ıaǵnı 36,5 paıyzyn gazǵa aýystyrý josparlanyp otyr», - dedi Ilıas Shoıbekuly.
Basqarma basshysynyń aıtýynsha, byltyr oblysta 500 myńnan astam avtokólik tirkelgen. Onyń ishinde benzınmen - 450 myń, dızel otynymen - 53 myń, syǵymdalǵan gaz otynymen - 4 myńnan astam avtokólik bar. Shymkent qalasy boıynsha 1700-ge jýyq qoǵamdyq kólik qyzmet kórsetedi, onyń 533-i gaz otynymen júrýge jabdyqtalǵan.
Budan bólek, jeke jáne zańdy tulǵalar qorshaǵan ortaǵa emıssııalar úshin ekologııalyq zańnamaǵa sáıkes tólemder júrgizedi. Bul oraıda oblys bıýdjetine túsken túsim 1 mlrd. 342 mln. teńgeni qurady.
Sonymen qatar, jer qoınaýyn paıdalaný boıynsha búgingi tańda basqarmamen 166 kelisim shart tirkelgen. 2017 jyly kelisim shartta kórsetilgen mindetterin oryndamaǵany úshin 12-si birjaqty sheshimmen merziminen buryn buzyldy. Ótken jyly basqarmanyń bastamasymen zańsyz jer qoınaýyn paıdalanýdy toqtatý maqsatynda 18 derek anyqtalyp, barlyq qujattar quzyrly memlekettik organdarǵa shara kórý úshin joldanǵan.
