OQO-da kóktemgi egistikten 86 myń tonna qyryqqabat eksporttalǵan
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev kezekti jumys saparymen Saryaǵash aýdanynda boldy. Elbasy mindettegen tapsyrmalar men memlekettik baǵdarlamalardyń aýdanda júzege asyrylý barysymen tanysý maqsatynda úsh birdeı sharýa qojalyq pen bir kásiporynnyń jáne turǵyn úı qurylysynyń jumysymen tanysty, dep habarlaıdy QazAqparat tilshisi.
Atalǵan adanda oblys ákimi 2 gektar jerge qyryqqabat ekken «Súndet ata» sharýa qojalyǵyna baryp, sharýashylyqtyń tynys-tirshiligimen tanysty. Qojalyq ıesi Ádilbek Baıbolatov aımaq basshysyna kókoramnyń faravon sortyn eki gektar aýmaqqa ekkenin, al ótken jyly atalǵan egistikten 140 tonna ónim alǵanyn málim etti. Búginde 8 adamdy jumyspen qamtyp otyrǵan sharýashylyq ónimderin jergilikti naryqtan bólek, Soltústik aımaqtar men Almaty, Astana qalalaryna jóneltip otyr. Qojalyqtyń jumysyn aralap kórgen aımaq basshysy búgingi kúnge óńir dıqandary 112 myń tonna qyryqqabat jınaǵanyn, onyń ishinde 86 myń tonna bolatyn ónim syrtqy naryqqa shyǵarylǵanyn atap ótti.
«Qazirgi ýaqytta oblysta osy erte merzimdik kókónisterdiń ornyna basqa daqyldardy egý jumystary júrgizilýde. Kóktemgi egistikten jınalǵan ónimniń 105,7 myń tonnasy eksportqa shyǵarylǵan. Onyń ishinde 64,7 myń tonnasy Saryaǵash aýdanynyń enshisinde eken. Bul árıne erte kóktemnen tynbaı eńbek etip otyrǵan eńbekqor sharýalardyń jemisi dep bilemiz»,-dedi Janseıit Túımebaev.
Budan keıin oblys ákimi Jaskeshý eldi mekenindegi jylyjaı sharýashylyǵymen aınalysatyn «Roza» JShS-niń jumysymen tanysty. Seriktestiktiń tóraǵasy Jaqsylyq Dúısebaevtyń aıtýynsha, 1 gektar aýmaqqa tamshylatyp sýǵarý ádisi arqyly qyzanaq ekken. Ozyq tehnologııanyń arqasynda sharýa ótken jyly 60 tonna ónim jınaǵanyn aıtady.
Jalpy, búginde óńirdegi jylyjaıdyń kólemi 1325 gektarǵa jetip, respýblıkalyq úlestiń 80 paıyzyn qurap otyr. Onyń 663 gektary, ıaǵnı 50 paıyzy Saryaǵash aýdanyna tıesili. Sapar barysynda oblys ákimi Aqjar eldi mekenindegi «Agro Fýd Qazaqstan» JShS-niń jumysyn da aralap kórdi. Eki jyl buryn jumysyn bastaǵan seriktestik 250 gektar aýmaqta ıntensıvti baý egýmen aınalysyp keledi. Qazirgi tańda 130 adamdy jumyspen qamtyp otyrǵan sharýashylyq baýdan 60 tonna alma ónimin alýdy josparlanyp otyr. Mundaı kórsetkish ońtústik óńirinde buryn-sońdy bolmaǵanyn aıtqan aımaq basshysy oblysta qarqyndy baýdyń sanyn kóbeıtý arqyly alma ımportyn azaıtyp, eksportty ulǵaıtýǵa bolatynyn atap ótti.
«Baýdan aldaǵy ýaqytta 60 tonna alma ónimin alý josparlanyp otyr eken. Oblystaǵy ortasha kórsetkish 15 tonna ekenin eskersek, mundaı ónim ońtústik óńirinde buryn-sońdy bolmaǵan. Qazirgi tańda ıntensıvti baýda 22 gektarǵa shıe, 13 gektarǵa órik, 70 gektarǵa shabdaly, 92 gektarǵa alma kósheti egilgen. Bul óńirdegi iri jobalardyń biri. Sondyqtanda osy seriktestińten tájirıbe almasyp, arnaıy mamandarmen jumys istep, osyndaı baýlardy kóbeıtýimiz kerek» - dedi oblys ákimi.
