OQO-da kókpardan el birinshiligi bastaldy
ShYMKENT. QazAqparat - Shymkenttegi ortalyq atshabarda qazaqtyń ulttyq oıyndary men kókpardan el chempıonatynyń jalaýy kóterildi. 16 jastaǵy bozbalalardyń saıysyna respýblıkamyzdyń 11 oblysynan komandalar qatysyp, at ústindegi úzdikterdi anyqtaýda, dep habarlaıdy QazAqparat tilshisi.
Saıys kókpardan basqa, jamby atý, teńge ilý, aýdaryspaqtan ótýde. Ulttyq sport túrin jandandyratyn jarysqa elimizden 300-ge jýyq sportshy jınaldy. Sonshama sáıgúlikke de arnaıy oryndar daıyndaldy. Jarystyń ashylýynda oblys sportynyń basshysy Álibek Nurtaev sóz alyp, jas shabandozdarǵa sáttilik tiledi.
On jyldyq tarıhy bar Ońtústik Qazaqstan oblysynyń ulttyq sport túrlerinen balalar men jasóspirimder sport mektebiniń kókparshylary óziniń basty qarsylasy Jambyl oblysynyń komandasyn qapy qaldyrdy. Ulttyq sport túrlerinen memlekettik bapker Ramazan Sáttibaev pen Ulttyq sport túrleri qaýymdastyǵy tóraǵasynyń 1-shi orynbasary Erlen Ospanov bıylǵy jarystarda topjarǵan shabandozdarǵa «Qazaqstannyń sport sheberi» ataǵyn tapsyrdy. Al, álem chempıondary halyqaralyq dárejedegi sport sheberi dárejesine usynyldy. Endi jeńimpaz atanǵan kókparshylar Asanbaı Asqarov atyndaǵy halyqaralyq týrnırde ońtústiktiń namysyn qorǵaıdy. Ózge sport túrleri boıynsha jarys qortyndylary aldaǵy kúnderi belgili bolmaq.
