OQO-da qoǵamdyq sanany jańǵyrtý baǵdarlamasyn iske asyrý barysy talqylandy
ShYMKENT. QazAqparat - Ońtústik Qazaqstan oblysynda qoǵamdyq sanany jańǵyrtý baǵdarlamasyn iske asyrý jónindegi óńirlik komıssııa otyrysy ótti.
Muhtar Áýezov atyndaǵy Ońtústik Qazaqstan memlekettik ýnıversıtetinde bolǵan sharaǵa zııaly qaýym ókilderi men ardagerler, Qazaqstan halqy Assambleıasy, úkimettik emes uıym ókilderi qatysty. Saıası partııalar men qoǵamdyq keńester, depýtattar men BAQ ókilderi de keleli jıynnan tabyldy, dep habarlaıdy QazAqparat HAA tilshisi.
Komıssııa otyrysyna arnaıy qatysqan oblys ákimi Janseıit Túımebaev aldymen Ońtústik Qazaqstan memlekettik ýnıversıtetiniń bazasynda qurylǵan óńirlik Jobalyq keńseniń jaıymen tanysyp shyqty. Jıynda alǵashqy sóz sóılegen aımaq basshysy Elbasynyń «Bolashaqqa baǵdar: rýhanı jańǵyrý» maqalasy - memlekettik ıdeologııany anyqtaıtyn basty saıası qujaty bolyp tabylatynyn jáne «Rýhanı jańǵyrý» baǵdarlamasynyń ońtústik óńirinde iske asyrý jumystarynyń ózektiligin atap ótti. Komıssııa otyrysynda óńirde Jobalyq keńse jumysy týraly onyń basshysy, oblys ákimi apparaty uıymdastyrý-ınspektorlyq jumys jáne óńirlik damý bóliminiń bas ınspektory Baqytjan Áshirbekov baıandady. Onyń sózinshe, oblys aýmaǵynda maqalany nasıhattaý maqsatynda arnaıy spıkerler toptary jasaqtalyp, BAQ arqyly qyzý qoldaý sharalary atqarylýda. Sondaı-aq áleýmettik jelilerde pikirler jarııalanýda. Maqalanyń mátini jazylǵan kitapshalar, ádistemelik quraldar shyǵarylyp, taratyldy. Budan bólek, halyqty birlikke, yntymaqqa, tatýlyqqa shaqyratyn jáne ulttyq qundylyqtardy, salt-dástúrdi dáripteıtin túrli derekti fılmder, rolıkter ázirleý qolǵa alynýda.
Sondaı-aq, oblystaǵy tarıhı-mádenı eskertkishter aýmaǵynda týrısterge qyzmet kórsetetin ulttyq qolóner buıymdary, kádesyılar satatyn saýda dúkenderin jáne tek ulttyq taǵamdar daıyndaıtyn dámhanalar ashý boıynsha tıisti jumystar atqarylýda. Alǵashqy nysandardyń biri retinde qazaq halqynyń salt-dástúri men ádet-ǵurpyn pash etetin Otyrar aýdanynda «Alash» etnografııalyq aýyly ashyldy.
Jastardyń boıyna óz eline degen maqtanysh pen Otanǵa degen súıispenshiligin qalyptastyrý maqsatynda jastardy, mektep oqýshylaryn oblysymyzdaǵy tarıhı-mádenı eskertkishter men kıeli oryndarǵa saıahat jasaýynyń kestesi ázirlenip, uıymdastyrylýda.
Qoǵamdyq sanany jańǵyrtý baǵdarlamasynyń 6 baǵytynyń 2-i respýblıkalyq deńgeıde júzege asyrylady. Olardyń qatarynda «Jańa gýmanıtarlyq bilim. Qazaq tilindegi 100 jańa oqýlyq» pen «Memlekettik tildiń latyn qarpine kóshýi» baǵyttary bolyp tabylady. Al, «Týǵan jer», «Qazaqstannyń kıeli jerleri», «Qazaqstannyń jańa 100 tulǵasy», «Qazirgi zamanǵy qazaqstandyq mádenıet jahandyq álemde» sııaqty 4 baǵyt óńirlerde júzege asady. Atalǵan barlyq baǵyttar boıynsha arnaıy 95 joba daıyndalyp, iske asyrý josparlanýda.
Keleli jıynda sonymen qatar «Atameken jáne azamattyq sana» taqyrybynda jazýshy, Halyqaralyq «Alash» syılyǵynyń laýreaty Marhabat Baıǵut qoǵamdyq sanany jańǵyrtý baǵdarlamasyn iske asyrý joldarynyń óńirlik erekshelikteri týraly baıandap ótti. Rýhanı jańǵyrýdyń mańyzdylyǵy men ereksheligi jaıynda «Intellekt Orda» Halyqaralyq áleýmettik-gýmanıtarlyq zertteýlerdi yqpaldastyrý ınstıtýtynyń bas dırektory, tarıh ǵylymdarynyń doktory, professor, akademık Sattar Májıtov, «Joǵary oqý oryndarynda jastardy qazaqstandyq patrıotızmge tárbıeleý joldary» taqyrybynda Ońtústik Qazaqstan memlekettik ýnıversıtetiniń rektory Jumahan Myrhalyqov tarqatyp aıtty. Joǵary oqý oryndarynda rýhanı jańǵyrýǵa qatysty turaqtylyq pen tatýlyq máselesi jaıly Ońtústik Qazaqstan memlekettik pedagogıkalyq ınstıtýtynyń rektory Ońalbaı Aıashev óz pikirin bildirdi.
Kezdesý barysynda qatysýshylar suraqtaryn qoıyp, tuşymdy jaýaptaryn aldy. Zııaly qaýym ókilderimen qyzý pikir almasýlar boldy.
Otyrys sońynda oblys ákimi Janseıit Túımebaev óńirdegi «Rýhanı jańǵyrý» baǵdarlamasyn iske asyrý boıynsha aýdan, qala ákimderine, basqarma basshylaryna jáne quzyrly mekemelerge tıisti tapsyrmalar birip, jıyndy qorytyndylady.
