OQO-da qoǵamdyq kólikterge baqylaý kúsheıtildi
ShYMKENT. QazAqparat - Ońtústik Qazaqstan oblysynda qoǵamdyq kólikterge baqylaý kúsheıtildi. Óńirdegi Aýmaqtyq kólik ınspektsııasynyń ókilderi men jol saqshylary jáne tıisti basqarma mamandary arnaıy reıdterge shyǵyp, avtobýstar men baǵyttardaǵy kólikterdiń tehnıkalyq jaǵdaıy men qujattaryn tekserdi, dep habarlaıdy QazAqparat tilshisi.
Sala mamandarynyń sózinshe, «Avtobýs» reıdtik sharasyn uıymdastyrýǵa sońǵy kezdegi qoǵamdyq kólikterdiń qatysýymen bolǵan apatty jaǵdaılar sebep bolǵan. Tekserý barysynda jolaýshy tasymaldap júrgen kólikterden 415 zańbuzýshylyq anyqtalǵan. 116 júrgizýshi jol júrý kezinde uıaly telefonmen sóıleskeni úshin ákimshilik jazaǵa tartylsa, 52-si jol erejesin óreskel buzǵan. 12 kólik tizgindegen azamat jyldamdyqty shamadan tys asyrsa, 16-sy jolaýshylardy ótkizbeı qoıǵan.
Sondaı-aq polıtseıler 36 avtobýstyń tehnıkalyq tekseristen ótpegeni jáne taǵy 15 júrgizýshiniń jolǵa shyǵý qujattary durys toltyrylmaǵany anyqtaldy. Bir qyzyǵy, keıbir júrgizýshiler kólikteriniń tehnıkalyq ahýalynyń qanshalyqty tekserilgenin de bilmeıtin bolyp shyqty.
Anyqtalǵan kemshilikter boıynsha ákimshilik hattamalar toltyryp, málimetter ishki ister organdaryna joldandy. Tıisti talaptardy oryndamaǵan júrgizýshiler men kompanııa basshylary endi zań aıasynda jaýapkershilikke tartylady. Polıtseıler bolsa reıdtik sharanyń 18 aqpanǵa deıin jalǵasatynyn aıtady.
