OQO-da qoǵamdyq qaýipsizdikti qamtamasyz etýge atsalysqandarǵa 4,5 mln. teńge syıaqy tólendi
Bul týraly «Qaýipsiz qala - Shymkent» jobasynyń atqarylý barysyn qortyndylaǵan óńir prokýrorlary málimdedi, dep habarlaıdy QazAqparat HAA tilshisi.
Prokýrorlar jobanyń aıasynda shym shahardaǵy qylmystylyq kórsetkish 19 paıyzǵa tómendegenin aıtady. Oǵan tek quqyq qorǵaýshylar emes, qarapaıym halyq ta atsalysqan. Máselen, árbir móltekaýdanda polıtsııanyń erikti kómekshileri toptary qurylyp, olar aýla, kóshe, kópqabatty úılerde kezekshilik jasaǵan.
«Joba iske asyrylǵan ýaqyttan bastap halyqpen 50-den astam kezdesý, kóshelerge 12 banner, telearnalarda, kınoteatrlarda jáne LED jarnamalarynda 5 túrli vıdeorolık kórsetýge yqpal jasadyq. Internet jelilerindegi Feısbýk, Tvıtter akkaýntterinde qujattar, jergilikti gazetterde basylymdar shyǵarylyp jatyr. Qazirgi tańda qalada jedel basqarý ortalyǵyna (JBO) qosylǵan 242 beınebaqylaý kameralarymen aýysymmen isteıtin 8 qyzmetker jumys atqarady. Osy jyly JBO-ǵa taǵy 204 kamera qosylmaq»,- deıdi oblys prokýrorynyń aǵa kómekshisi N.Seıdalıev.
Shymkent qalasyndaǵy qylmystylyqty tómendetý maqsatynda birqatar is-sharalar iske asyrylýda, onyń ishinde qalany árbir 10-100 myń adam turatyn sektorǵa bólip, jaýapty laýazymdy tulǵalardy bekitý, bul is-shara naqty sektordyń áleýmettik-turmystyq, krımınogendik jáne basqa da problemalaryn monıtorıngileýge jáne qylmystyqtylyqtyyń aldyn alýǵa ońdy septigin tıgizedi deıdi prokýrorlar.
Búginde qaladaǵy qylmystyq ahýaly nashar móltekaýdandardaǵy jaldamaly páterlerde turǵyndar tynyshtyǵy jıi buzylatyny, ádepke qaıshy sıpattaǵy is-áreketter oryn alatyny anyqtaldy. Sondaı-aq móltekaýdandarda páter jáne avtokólikterden urlyqtar basym ekendigi belgili boldy. Osy máseleni sheshý maqsatynda oblys ákimine kópqabatty úıler ornalasqan shaǵynaýdandarda parkıngter salý usynylyp otyr.