OQO-da kitap oqýǵa qatysty marafon ótkizildi
ShYMKENT. QazAqparat - Búgin el Táýelsizdiginiń 25 jyldyǵyna oraı Ońtústik Qazaqstan oblysy Otyrar aýdanynyń oqýshylary arasynda «25 kitap oqımyz» atty kitap oqý marafony ótti, dep habarlaıdy aýdan ákimdiginiń baspasóz qyzmeti.
Oqýshylardyń kitap oqýǵa degen qyzyǵýshylyqtaryn arttyrý, nasıhattaý, otansúıgishtikke tárbıeleý maqsatynda ótken sharaǵa aýdan ákiminiń orynbasary Ryskeldi Álish qatysyp, el erteńi jastardy quttyqtady. Quttyqtaý sózinde Elbasymyz Nursultan Nazarbaevtyń «Men qazaqstandyqtarǵa, ásirese jastarǵa taǵy da aıtamyn: kitap oqyńyzdar! Búginde ulttyń básekege qabilettiligi onyń bilim deńgeıine baılanysty. Kitap adamdy jan-jaqty damytady, oı-órisin keńeıtedi»,- degen sózin dáıektegen aýdan ákiminiń orynbasary barsha jastardy kitap oqýǵa shaqyrdy.
Saıysqa aýdandaǵy 5 orta mekteptiń úzdik oqýshylarynan jasaqtalǵan komanda qatysyp, «Bilimdi oqyrman bolashaǵymyz», «Kitap qasıeti - máńgilik», «Kúsh bilimde - bilim kitapta», «Tapqyr bolsań, taýyp kór» kezeńderinde baqtaryn synady.
Saıys barysynda oqýshylardyń úlken daıyndyqpen kelgendigi aıqyn ańǵaryldy. «Táýelsiz elimizdiń bolashaǵy, erteńi úshin barlyq kúsh-qaırattaryńdy zaman talabyna saı tereń bilim alýǵa jumsańdar» degen ulaǵatty ustazdar ustanymy osy jastarymyzǵa aıtylǵandaı.
Aıta keteıik, elimizdiń túkpir-túkpirinde Qazaqstan Respýblıkasy Táýelsizdiginiń 25 jyldyǵyna oraı «25 kitap oqımyz» atty kitap oqý marafony ótkizilgen bolatyn.
