OQO-da kıeli jerler tarıhyn jańǵyrtqan baıqaý ótti
ShYMKENT. QazAqparat - Elbasynyń «Bolashaqqa baǵdar: rýhanı jańǵyrý» maqalasyn nasıhattaý maqsatynda qurylǵan «Qasıetti Qazaqstan» ortalyǵynyń kúngeılik belsendileri «Ońtústik Qazaqstannyń kıeli jerleri» baıqaýyn uıymdastyrdy. Saıysqa oblys aýmaǵyndaǵy 25 murajaı ókilderi qatysyp, baq synady, dep habarlaıdy QazAqparat HAA tilshisi.
Baıqaýdyń maqsaty- eldegi ańyz-áńgimelerge súıene otyryp, kópshilik bile bermeıtin qasıetti, kıeli oryndardy nasıhattaý boldy.
Máselen, ólketanýshylardyń dereginshe, oblys aýmaǵynda 100-ge tarta kıeli-tarıhı tanymdyq jer bar. Alaıda, olardyń kópshiligi halyqqa beımálim. Onyń ústine ońtústik jeri ertedegi saq, ǵun, qańly taıpalary qonystanǵan kıeli meken sanalady. Ony óskeleń urpaq bilip, ósýi tıis. Osyny eskergen uıymdastyrýshylar baıqaý qatysýshylaryna osyndaı jerlerdi anyqtap, halyq sanasyna sińirý joldary boıynsha birneshe talaptar qoıdy.
Jalpy, baıqaýǵa murajaılardan bas-aıaǵy 40-qa jýyq týyndy joldandy. Sondaı-aq saıys sharty boıynsha mýzeı qyzmetkerleri 3-5 mınýttyq beınerolık túsirýi qajet boldy. Qazylar sheshimimen úzdik týyndylar iriktelip, jeńimpazdar marapattaldy. Al, qatysýshylar tarapynan túsirilgen beınerolıkter endi Astanada kópshilik nazaryna usynylady.
Sala mamandarynyń sózinshe, bul shara óńirge keletin týrıster sanynyń artýyna da sep bolmaq.
