OQO-da «Kıeli Qazyǵurt» atty anımatsııalyq fılmniń premerasy ótti
Oblys ákimdiginiń tapsyrysy negizinde «SAQ» kınostýdııasy túsirgen «Kıeli Qazyǵurt» atty tarıhı-tanymdyq mýlfılmniń premerasy «Shymkent plaza» oıyn-saýyq saýda ortalyǵynda ótti.
Atalǵan týyndy Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy negizinde túsirilgen. Ondaǵy maqsat óńirimizdegi týrızm salasyn damyta otyryp, Kıeli Qazyǵurt taýynyń mańyzdylyǵyn jas órenderge keńinen túsindirý jáne kóneden kele jatqan ańyz-áńgimelerdi nasıhattaýǵa baǵyttalǵan.
Halyq aýyz ádebıetindegi jyr-dastandarymyzdy ekranǵa shyǵaryp, sol arqyly óskeleń jas urpaqqa óz eliniń tarıhyn, salt-dástúrin dáripteý maqsatynda túsirilgen mýltfılmniń tusaýkeser keshine oblys ákimi arnaıy qatysty.
«Ultymyzdyń bolashaǵy búldirshinderimizdiń tilinen bastalady. Olar jastaıynan ulttyq qundylyqtarǵa baı, qazaq tildi mýltfılmderdi kórip ósýi kerek. Óıtpegen jaǵdaıda sheteldik týyndylarmen sýsyndaıtyn bolady. Bul sózsiz balalarymyzdy ulttyq qundylyqtarymyzdan alystatady. Sondyqtan da men osyndaı anımatsııalyq fılmder jasaýdy tapsyrdym», - dedi ıdeıa avtory Janseıit Túımebaev.
Aımaq basshysynyń ıdeıasymen «Bolashaqqa baǵdar: rýhanı jańǵyrý» maqalasy aıasynda oblysta «Qajymuqan», «Otyrardy qorǵaý», «Kıeli Qazyǵurt» atty úsh anımatsııalyq fılm men «Kóne jetigenniń syry» atty 10 serııaly telehıkaıa túsirildi.
Óńirdiń týrızm salasyn damytýǵa, ásem tabıǵaty men kıeli jerlerin jáne dostyq pen tatýlyqty nasıhattaıtyn bul kınokartınalarda ulttyq rýhty kóterý kózdelgen.
«Parıotızm ózińniń kindik qanyń tamǵan jerińe, ózińniń týǵan aýylyńa súıishpenshilikten bastalady» degen Elbasynyń sózi bar. Óziniń týǵan aýylyn súıe almaǵan azamat, eshqashan óziniń týǵan memleketin súıe almaıdy. Bul aksıoma. Sondyqtan da biz ońtústikqazaqstandyqtar bolyp, osyndaı fılmderdi túsirý arqyly tek qana ońtústiktiń mártebesin ǵana emes, qazaq halqynyń rýhanı qundylyǵyna áser etetin búkil oblystaǵy qazaq balalarǵa, baýyrlarymyzǵa qozǵaý salatyn osyndaı fılmderdi túsirgenimizge qýanyshtymyz», - dedi oblys ákimi.
Shara barysynda óńir basshysy «Saq» stýdııasynyń dırektory Nýrıddın Patteevti oblysqa sińirgen eńbegi úshin medalimen, fılmniń stsenarııin jazǵan Batyrhan Dáýrenbekov pen Baqytjan Quljabaıdy alǵys hatpen marapattady.
Aıta keteıik, Saq kınostýdııasy búginge deıin 50-den astam anımatsııalyq 5 tolyqmetrajdy fılm jasaǵan. Sondaı-aq, «Tompaq», «Qalqanqulaq» atty serıaldar túsirip úlgergen.
