OQO-da keńse men mektepke jarylǵysh zat «qoıǵan» azamat ustaldy

ShYMKENT. QazAqparat - Ońtústik Qazaqstan oblysynda polıtseıler Almatydaǵy keńse men aýyldaǵy mektepke jarylǵysh zat qoıylǵan degen turǵyndy ustady, dep habarlaıdy QazAqparat tilshisi.

Oblystyq ishki ister departamenti baspasóz qyzmetiniń málimetinshe, Qazyǵurt aýdandyń polıtsııa basqarmasyna aýyldyq mekteptiń dırektory habarlasqan. Onyń sózinshe belgisiz bireý habarlasyp, bilim uıasyna jarylǵysh zat qoıylǵanyn aıtypty.

Oqıǵa ornyna oblystyq ІІD men jergilikti polıtsııa, basqa da qutqarý qyzmetiniń qyzmetkerleri jumyldyryldy. Jedel túrde mektepti qorshaýǵa alyp, ishindegi adamdardy syrtqa shyǵardy.

Sondaı-aq, jaqyn mańdaǵy turǵyndardy da úılerinen alysqa shyǵardy. Alaıda mekteptiń ishin qaraý barysynda eshbir jarylǵysh zat tabylmaǵan. Jedel izdestirý sharalaryn júrgizgen Oblystyq ІІD men UQK qyzmetkerleri jalǵan habarlama taratty degen kúdikpen 1995 jyly týǵan turǵyndy qolǵa túsirdi. Ony tekserý barysynda seziktiniń júıke aýrýlar dıspanserinde tirkeýde turatyny anyqtalǵan.

Belgili bolǵandaı, ustalǵan azamat sol kúni Almaty qalasyndaǵy keńselerdiń birinde de jarylǵysh zat bar dep jalǵan habarlama bergeni rastaldy. Sala mamandary keńseni tekserý barysynda da eshbir jarylǵysh zat tappaǵan bolatyn.

Qazirgi tańda kúdiktiniń ústinen Qylmystyq kodekstiń 273-baby «Terrorızm aktisi týraly kórineý jalǵan habarlaý» boıynsha is qozǵalyp, tergeý amaldary júrgizilýde. Kúdikti ýaqytsha ustaý ortalyǵyna qamaldy.

Aıta keteıik, jyl basynan beri óńirde terrorızm aktisi týraly jalǵan habarlama taratý boıynsha úsh derek tirkelip, eki adam sotty boldy.